ISRO-i GSAT-19 Satellite den rocket takok ngua khakettsü

New Delhi, June 05 (Agencies): Hombar nikongdang 5:28 ako nung Indian Space Research Organisation (ISRO)-i Sriharikota nung aliba Satish Dhawan Space Center nungi GSLV-Mark III rocket takok ngua geo synchronous orbit nung khakettsüogo.
Iba rocket nung touzük seret 3,136 GSAT-19 communication satellite lir, aser ibaji alima nungi kilometer 36,000 pilar anentsü.
Iba rocket ya sen crore 300 shi intoka yanglu aser küm 15 shia agia yangluogo.
Scientist temi “Monster Rocket” ta ajaba rocket yagi seret 4,000 indang satellites bentettsü.
India-i seret 2,300 dak tema communication satellites khakettsütsü atema tanga linüktem nungi teyari agia liasü, ajisüaka tang iba rocket khakettsüba sülenbo India-a satellite kanga taret khakettsütetba linüktem (elite club) rongnung adentsü.
Tang tashi nungbo United States, Russia, Europe, China aser Japan linüktem ang satellite taret khakettsütetba elite club nung lir.
Iba rocket ya indigenous cryogenic engine ka ajanga tashi agütsür, aser iba nungji liquid oxygen aser liquid hydrogen amshir.
Tang iba rocket khakettsüba ajanga India-i anüngtawa (space)-i nisung yoktsü merangba maparen nung jenjang ka alangzüktettsü imlar.
Osang angazükba agi, space-i nisung yoktsü atema inyakba mission atema ISRO-i Centre dang nungi sen crore 12,500 meshir, aser ibaji sorkari agizükra iba mission atema küm tenet shi agitsü.