ISRO-i scramjet engine tendangtsü

Chennai, August 27 (Agencies) :Indian Space Research Organisation (ISRO)-i parnok meyong scramjet engine, tanü Deobarnü tendangtsü saka geosynchronous satellite launch vehicle (GSLV-MkII) ajanga kahkettsütsü aliba weather satellite INSAT-3DR, September ita tashi thinena atar, ta Honibarnü ketdangser tejen kati ashi.
India nunger rocket kahkettsüba tesem Satish Dhawan Space Centre (SDSC) ya Chennai nungi kilometre 80 shi pilar, Sriharikota, Andhra Pradesh nung lir.
“Scramjet (air breathing) engine ya Deobar anepdang 6:00 ako nung tendangtsü,” ta SDSC nung director P. Kunhi Krishnan-i IANS dang ashi.
Mopung aonba yimya shitak dang lira iba rocket ji anepdang 6:00 ako nung kahkettsütsü mesüra tera menur asüyonga kahkettsütsü.
Scramjet engine ya rocket kahkettsü dang anünglak atongtsü mapang ang amshir aser iba engine yagi totzü den nüngdakba oxidiser ajemdaktsüba ajanga rocket kahkettsüba mapang sen jenti kümzüktettsü.
Tamalen Krishnan-i India meyong weather satellite August 28, 2016 nü anünglak tonga kahkettsütsü metetdaktsübaji September 8, 2016 tashi thinener ta sshiogo.
Satellite kahkettsütsü mapang thinenba indang asüngdangdang pai, “Iba satellite tendangba mapang technical timtem kar putetba ajanga thinen, ajisüaka iba timtemji putetogo,” ta langzü.
Pai, weather satellite INSAT-3DR kahkettsütsü atema GSLV rocket renema amentepa lir aser anogo asem nungi pezü tsüngda nung satellite ji rocket nung amenloktsü, ta shisem.
Ketdangsertemi ashiba agi, ISRO-i tzü mopung asadangba satellite, ScatSat ji polar satellite launch vehicle (PSLV) ajanga taruba ita nung anünglak nung amentsü.
India aser Algeria satellite na rocket ka ajanga kahkettsütsü saka orbit balala nung anemtsü. Anungji rocket indang engine pezübubaji mezüng ScatSat amenba sülen shibangtsü. Ina sülen minute 30 shi lir külen engine ji tanaben atemloker Algeria satellite ji pa amentsü aliba orbit nung amenoktsütsü.