ISRO-i Weather Satellite ka taruba ita kahkettsütsü

Chennai, July 22 (Agencies) : Taruba ita Rocket tesashi, geosynchronous satellite launch vehicle (GSLV-Mk II) ajanga India-i weather satellite ka anünglak nung kahkettsütsü, ta tanü Hokolbarnü Indian space agency tekolakba AS Kiran Kumar-i Chennai nung metetdaktsü.
Indian Space Research Organisation (ISRO)-i weather satellite, INSAT-3DR ka taruba ita GSLV rocket amshia kahkettsütsü, ta Kiran Kumar-i Madras Institute of Technology Alumni Association senden nung ashi.
Küm shia satellite 6 nungi 8 tashi kahkettsüa liasü saka tang nungibo küm shia 12 nungi 18 tashi kahkettsütsü nükjidong nung inyaktsü, ta pai ashi.
Vikram Sarabhai Space Centre (VSSC) nung director K Sivan-i, tsüngsang mopung metettsü aser takzütsü atema ISRO-i ScatSat satellite ka polar satellite launch vehicle (PSLV) rocket ajanga kahkettsütsü, ta ashi.
Iba rocket yagi ScatSat satellite den Algerian Satellite (ALSAT) dena külemi bener atutsü, ta pai ashi.
“Satellite anaprong ya orbit balala nung amenoktsü. Anungji rocket engine pezübubaji ScatSat amenoka yutsüba sülen shibangadoktsü. Iba sülen minute 30 shi lir külen engine ji tanaben atemloker ALSAT pa amentsü aliba orbit shitak nung amenoka yutsütsü,” ta Sivan-i ashi.
Pai, “Taküm kümsa Sriharikota rocket port, Andhra Pradesh nungi GSLV-Mk-III agi GSAT 19 satellite-a amentsü. Iba satellite tuozükji ton 3.2 lir. Ibai India nunger satellite rongnung tarettiba satellite asütsü,” ta shisem.