ISRO-i word record yanglutsü nükjidong lir

Chennai, October 28 (Agencies) : Indian space agency ISRO-i 2017 küm rocket ka ajanga anünglak nung satellite 83 — 2 India aser 81 bendanglen yangluba — kahketja world recod yanglutsü nükjidong lir, ta Antrix Corporation nung ketdangser kati ashi.
Ibai sen crore 500 alang mapa lir, ta pai shisem.
“2017 küm tenzüker mezüng ita asembuba nung onoki rocket ka nung satellite 83 tashi anünglak tonga kahkettsütsü. Bendanglen yangluba satellite temji timba ka nano satellite tem alitsü,” ta Antrix Corporation nung Chairman-cum-Managing Director Rakesh Sasibhushan-i IANS dang ashi.
Antrix Corporation ya Indian Space Research Organisation (ISRO) indang commercial arm lir.
Rakesh Sasibhushan-i, satellite 83 pronglaji orbit ka nung yutsütsü anungji rocket sibangli lapokli asütsü tenüngdaktsü madoktsü, ta ashi.
Mapa tasaktibaji satellite 83 prongji orbit kasa nung meyutsüma tashi rocket sota atatsübaji lir.
Pai, ISRO-i item satellite kahkettsütsü atema Polar Satellite Launch Vehicle XL (PSLV-XL) rocket amshitsü, ta shiogo.
Khen nung satellite aika yutsütsübaji ISRO atema mapa tasen ka masü. Tesüiba mapangtem nunga iba ama mapa ya aiben inyakdangogo.
Sasibhushan-i ashiba agi, PSLV-XL rocket nung bener atutsü aliba khuji seret 1,600 shi asütsü.
ISRO-i orbit nung yutsütsü aliba satellite kiburtem tenüng memetetdaktsü saka kibur kar indangbo tesüiba mapang nunga kahkettsüogo, ta Sasibhushan-i ashi.
ISRO-i rocker taret kahkettsütsü atema parnok meyong cryogenic engine aketba Geosynchronous Satellite Launch Vehicle-Mk III (GSLV Mk III)-a tendangdar.
GSLV Mk III yagi khu tonne 4 tashi bener tutettsü.
Tang shia aliba rocket ji January 2017 nung kahkettsütsü sentong lir.
ISRO Mendenbuba A.S. Kiran Kumar-i, onoki tonne 4 taret communication satellite tem agi tonne trok communication satellite den saku mapa inyaktsüsa yanglutsü tebilemba lir, ta ashi.