ISSF Junior World Cup: Rushiraj Barot-i gold medal agizük

Gabala, September 20 (Agencies): Rushiraj Barot-i gold agizükba densema, India’er asayartemi tang tasayadak ISSF Junior World Cup 2016 anogo tasembuba nung takok ngua tanü, Mongolbar nü shilem agiogo.
Barot-i tebur junior 25m rapid pistol tetoktepba nung temaba jenjang ngua, India asoshi gold agizükja liasü.
Points 556 ajangzüka asayar 6 densemba final nung shilem agitsü temeten angur asayar 5 buba akümsang, Barot-i final asaya nung points 25-23 agi Czech Republic nunger Lukas Skoumal den temaba jenjang ngua, gold medal-ji agizüka liasü.
Kasa tetoktepba nung Australia nunger Sergei Evglevski-i tasembuba jenjang ajangzüka, bronze medal agizük.
Arishi küm 19 tain Barot-i tan gold agizükba ya pai Junior World Cup tetoktepba nung tan mezüngsüa gold medal agizüker lir.
Germany kübok Suhl nung taküm, 2016 küm May ita agiba 1 buba Junior World Cup tetoktepba nung Barot-i tebur junior 25m rapid pistol tetoktepba nung 9 buba jenjang ngua liasü.
Barot-i gold agizükba dak alaka, tanüngba India asayartemia gold 1 densema, ajak agi medal 4 tashi agizükba ajanga par teloki tan tetoktepba nung gold 6, silver 4 aser bronze medal 8 densema, ajak agi medal 18 agizüker telok küma, tan tetoktepba nung medal timtiba agizüker telok tarensen nung 2 buba jenjang abener telok kümogo.
Russia teloki gold 10 agizükba densema, ajak agi medal 21 tashi agizüka, temaba jenjang ajangzüka lir.
Barot-i gold agizükba jakdang külem India asayar, Pratik Borse, Arjun Babuta aser Prashant nungeria ajak agi points 1849.9 ngua, tebur 10m air rifle team gold agizüka liasü.
Iba tetoktepba nung Singapore teloki points 1847 ajangzüka, silver aser Japan teloki points 1846.8 ajangzüka, bronze medal agizük.
Individual final nung Arjun Babuta-ia bronze medal agizükba osang jangjaogo.
Kasa tetoktepba nung Czech Republic nunger Filip Nepejchal-i gold aser Japan nunger Atsushi Shimada-i silver agizük.
Anmol, Nishant Bhardwaj aser Arjun Das nungeria aroki lungjemer points 1600 ajangzükba sülen parnoki tebur junior 5m pistol team silver agizüka liasü.
Kasa tetoktepba nung Russia teloki points 1640 ajangzüka, gold medal angu.
Tetsür junior 10m air rifle tetoktepba nung Dilreen Gill, Geetaksmi Dixit aser Aashi Rastogi nunger densemba India teloki team bronze agizüka liasü.
Asayartemi taruba anogo 2 tashi maneni toktepa asayaba sülen tan ISSF Junior World Cup tetoktepba ya tembangtsü sentong lir.