ISSF World Cup: Jitu Rai-i gold medal angu

New Delhi, March 1 (Agencies): Indian nunger shooter Jitu Rai-i tang tasayadak ISSF World Cup, 50m air pistol kahtepba nung gold medal nguogo.
Final asaya tetenzük nung Jitu-i kanga junga masayateti liasü, saka tatem nung pai kanga junga asayaba ajanga point 230.1 ngua otsü tasen ka yanglu.
Iba asaya kasa nung Amanpreet Singh-i silver medal ngua India nunger asoshi takok ana bener arutsü.
Jitu-i Mongolbarnü International Shooting Sport Federation (ISSF) World Cup 10m air pistol kahtepba nung Bronze medal ka ngua liasü.
Jitu shibai taoba mapang nung mixed trap nung gold medal ka ngua liasü, pai maneni iba asayamong nung final asaya nung points 216.7 ngua tanabuba medal angu.
Hombarnü Ankur Mittal-i teburtem Double Trap asaya nung silver medal ka angu, aser ibaji pai asayaba tepiyong nung sempet anguba rongnung tulutiba liasü.
Küm 25 tain shiba tebu Ashok Mittal aser teti Ajay Mittal nungera nüngtugu shoot gun akhartem lir, pai iba takok ajanga India nunger aika nem tepela bener arutsü, kechiyong Rio Olympics nung India nunger prangpong akhartemi junga masayaba sülen nisung aika tezü danger liasü.
Taoba mapang Heena Sidhu aser Jitu Rai nati International Shooting Sport Federation (ISSF) World Cup 10m Air Pistol temeyoktep asaya nung gold medal angu. Tenati final nung Japan nunger koka iba asaya nung India nunger asayar rongnungi mezüngbuba medal ngua liasü.