ISSG-i Syria nung tongpang rarabaren anentsütsü pangjemer

Munich, February 12 (Agencies): United aser Russia nati ayonga Germany kübok Munich yimti nung Syria senden ka tanü, Hokolbar nü amenba sülen International Syria Support Group (ISSG)-i Syria ajunga nung tongpang rarabaren tekaratiba nung anentsütsü onük pangjema agizükogo.
Mangatettep ken o tulu adoka tongpang kanga sashia raraba ajanga nüburtem nem timtem toushi jenti bener aruja aliba Middle East linük, Syria nüburtem nem nungdakba teyari osettsütsettema tekaraba mapang nung tongtsütsü alizüng ISSG-i tanü ayuba osanga jangjaogo.
Ano, Geneva nung taoba mapang amenba Syria yimjung senden maneni tekaratiba mapang nung mendaktsütsü telemtetba ka ISSG-isa agiba osang jangjaogo.
“Syria ajunga nung tongpang rarabaren hopta ka tsüngda nung anentsütsü alizüng ayuba den külemi, tang chiyongtsü aser mozü mora peria mongui alir nüburtem nem nungdakba teyari osettsüset tekaratiba nung tongtsütsü asoshi ISSG-i lemtetogo,” ta US Secretary of State, John Kerry-i tanü metetdaktsü.
Ajisüaka, tang Syria Tir, Bashar al-Assad-i aniba Syria sorkar aser sorkar anemer na tsüngda tongpang rarabaren anentsütsü tasa aser lenmangtem tatem küma melateti lir ta pai shisem.
Syria nung teti asoshi yimjung lidaktsütsü nükjidong nung ISSG-i tanü telemtetbatemji agir lir.
“ISSG-i Syria nung yimji yimjung lidaktsütsü nükjidong nung telemtetba ishika agiogo. Ajisüaka, Syria nung mangatettep adoka alirtemi lenji otepa yimjung tezüngzüktep agiba ajanga dang tan agiba telemtetba ajunga mapa küma inyaktettsü,” ta Kerry-i metetdaktsü.
Tanü senden nung linük 17 aser alima jenjang nung tentetba tongti tentet lenirtemi shilem agia liasü.
United Nations (UN)-i ayonger Syria sorkar aser sorkar anemer na tsüngda Geneva nung yimjung senden ka tan February ita tetenzüklen amen saka iba sendenji takok ngua mementetba yong sendenji maneni tan February ita 25 nü nungi tenzüka amentsü lemteta lir.