Istanbul nung nisung 10 pokset; 15 yiru

Mongulbarnü Istanbul kübok Sultanahmet district nung aliba Blue Mosque jakdang bomb tesashi ka apokba sülen police aser media nisungtem adenshia aliba noksa nung angur. (Istanbul, January 12)

 Isatanbul, January 12 (Agencies) : Turkey yimtiba Istanbul nung raliwalirtemi kanga dang sapua semdangba tesem ka nung Mongulbarbnep bomb tesashi ka apok aser iba lendong nung nisung 10 pokset aser 15 yirua lir.

Sultanahmet district nung bomb apokbaji bushisüngdang südar ta osang angazüker, ajisüaka sorkar meyong TRT television-ibo bomb ji suicide bomber ka ajanga pokdaktsü ta metetdaktsüogo.

Bomb apokba ola tesashiji meta talangka pilar-a angashia liasü aser bomb ji nüngshilung Blue Mosque nungi metre 25 shi ka dang pilar apok.

Iba tatalokba sülen police-i tesem longpang aser ano bomb tanabuba apoktsü akok ta asüba agi nisung shinga marudaktsü.

Istanbul nung raliwalirtemi semdangba tongti tesemji Sultanahmet kiyong lir aser iba nung Topkapi Palace aser Haghia Sophia museum lir.

Iba tatalokba sülen Turkish Prime Minister Ahmet Davutoglu-i rongdak security senden ka ayongzüka agi.

Yaküm Turkey nung bomb tesashi anaben tashi pokdaktsüogo aser tatalokba anaprong nung Islamic State nem tai tonglokja liasü.

Yaküm July ita Syria den arrtsüa aliba Suruc jila nung bomb tesashi ka apok aser iba lendong nung nisung 30 shi ka pokset.

Ano October ita nunga Ankara nung aliba train station kima nung suicide bomb ana tashi apok aser iba lendong nung nisung 100 den timba pokset.