Istanbul nung nisung 38 pokset; 166 shi yiru

Istanbul, December 11 (Agencies) : Honibar aonung central Istanbul nung tapoktsü tesashi ana apokdang police 30 aser civilian 8 asüba den ano nisung 166 yiru, ta sorkar ketdangsertemi ashi.
Interior Minister, Suleyman Soylu-i, Besiktas district stadium nung osangbenertem den senden amenba mapang police mita aliba tesem ka nung gari ka arua apok. Football asaya ka temer gondha ka ser tesadang shi lir külen iba lendong ya atalok, ta ashi.
Deputy Ato Kilonser Numan Kurtulmus-i, football asayaba reprangeri arurtem stadium toktsüli iba tapoktsü tesashi apok, ta ashi.
Soylu-i, Iba lendong ataloker minute 45 shi lir külen ano taküm bendanga agütsür tapoktsü pokloktsür kati iba stadium anasa aliba Macka Park nung pa dak alenloka aliba tapoktsü tesashi ka pokdaktsü, ta ashidang, iba tatalokba dak sendakba nung mulung melemi bilemba nisung 10 pua lir, ta shisem.
Item tapoktsütem ana ya kanga tesashi asüba agi tesem ajak nungi angashi, ta osangbenertemi ashi.
Lendong nung yirur asem tashi tasü taküm tsüngda lir, aser parnok 17 surgery agiogo, ta Health Minister Recep Akdag-i metetdaktsü.
Turky Tir Recep Tayyip Erdogan-i, “Azü tokshiaka onoki maneni raratsü,” ta tweet asü.
Iba lendong ana atalokba sülen nüburtemi ano tapoktsü ka apokba angashi.
Osangbenertemi ashiba agi, tasembuba lendongji mezüng lendong atalokba tesem nung temulung melemteti aliba gari ka apokba lir aser iba tatalokba bushisündangtsü atema mongin trok nem nungloktsüogo.
Turkey nung yimti tulutibaji Istanbul aser linük yimtibaji Ankara lir. Iba yimti ana nung ya yaküm nungi security mejungi akümba ajanga mapang shia lendong ataloka arur. Taküm June ita nung taküm bendanger agütsür asemi Istanbul nung tongtibang tayimtsü anenba tesem amakdang nisung 45 taküm lalutsüogo.