Istanbul nung police 11 pokset, 36 shi yiru

Turkey kübok Istanbul yimti nung pokshiba lendong ka atalokba sülen police aser firefighter ketdangsertemi lendong atalokdak bushisüngdangba noksa nung angur. (Istanbul, June 07)

Istanbul, June 07 (Agencies): Turkey kübok Istanbul tiyongtsülen jajaba police bus gari ishika anasa car gari nung alenokba bomb pokdakja lendong tesashi ka tanep, Mongolbar anepdang atalokdaktsüba osang ka Istanbul Governor, Vasip Sahin-i metetdaktsüogo.
“Police ketdangser aniba bus ishika ajangdanga aodak pokshiba lendong tesashi ka tanep atalokdaktsüba sülen tang tashi nung nisung 11 poksetba aser nisung 36 shi yiruba osang jangjaogo,” ta pai osang jangjashitsü.
Tan lendong atalokba ya Turkey nung tentetba yimti tulutiba, Istanbul nung taküm 2016 küm tenzüker tanü tashi nung pokshitsü lendong tesashi 4 buba ataloker lir.
Tan lendong atalokdaktsüba atema telok shingaia tang tashi nung tenüng agia metetdakja mali saka Turkey sorkar anemer Kurd kin telungpurtemi tanü lendongji atalokdaktsü akok ta sorkar ketdangsertemi temulung malemba olen ka metetdaktsüogo.
Kidangsüa aliba Syria aser Iraq na nung Islamic State (IS) kiralongrar teloki lendong kanga sashia atalokdaktsüba ajanga Turkey nunga tan amala lendong kanga sashia ataloktsü tenzükba osang bushiteta lir.
Tan lendong atalokdaktsü aka, par Turkey linük densemba North Atlantic Treaty Organization (NATO) tenteti kiralongrar anema rarabaren mameni agitsü lemteta osang ka Turkey Tir, Tayyip Erdogan-ia metetdaktsüogo.
“Onoki kiralongrar anema tatem tashi tetsübo kecha meli raratsü,” ta pai tanü lendong nung yirur den mozükidang ajurudang sangoktsü.
Ano külen, tan lendong nung asür rong nung police ketdangser 7 aser nübur 4 densemba osang jangjaba den külemi, tan yirur rong nung parnok 3 tashi taküm tia kanga mejungi aliba osang ka Sahin-isa metetdaktsü.
IS teloki Istanbul kübok raliwalirtemi kanga lungsoa semdangdak pokshiba lendong 2 tashi atalokdaktsüba aser Ankara yimtiba nung Kurd telungpur teloki car gari nung alenokba bomb 2 tashi pokdaktsüba densema, Turkey-i taküm küm tenzüker tanü tashi nung pokshiba lendong tesashi 4 tashi ajurua lir.
Taoba May ita 12 nü Istanbul nung atalokdaktsüba car gari nung alenokba bomb pokdaktsüba lendongji par teloki atalokdaktsü ta 1984 küm nungi tenzüka Turkey sorkar den raraba telok, Kurdistan Workers Party (PKK)-i tenüng agia meetadakja liasü.