Istanbul tiyongtsülen nisung 5 pokset; 36 shi yiru

Turkey kübok Istanbul yimti yimdong nung bomb lendong tesashi ka tanü, Honibar nü atalokba sülen emergency ketdangsertemi lendong atalokdak mapa inyakba noksa nung angur. (Istanbul, March 19)

Istanbul, March 19 (Agencies): Peisasa pokseta asütsü mulungteter kiralongrar kati pa temang nung alenokba bomb pokdakja Turkey kübok Istanbul yimti nung lendong tesashi ka tanü, Honibar nü atalodaktsüogo.
“Istanbul tiyongtsülen, Istikal Caddesi yimdong nung atalokba bomb lendong nung lendong ataloktsüsang densema, ishiba agi nisung 5 poksetba aser nisung 36 shi yiruba osang tang tashi nung jangjaogo,”  ta Turkey Health Minister, Mehmet Muezzinoglu-i osang jangjashitsü.
Paisa ashiba agi, tanü yirur rong nung bendangera nisung 12 shi densemba osang angazükogo.
Tan lendong atalokba ya taküm, 2016 küm tenzüker tanü tashi nung Turkey nung tan amala lendong 4 buba ataloker lir.
Ketdangsertemi tan lendong den sentakba bushisüngdang agiba sülen Turkey sorkar anemer Kurdistan Workers Party (PKK) mesüra par telok den sentaktepba telungpur telok kari tan lendongji atalokdaktsüba osang bushitetogo.
Ankara yimtiba nung tan amala lendong tesashi ka tan March ita tetenzüklen atalokdakja ishiba agi nisung 37 poksetba osang bushitetba den külemi, taoba February ita nunga Ankara nungsa bomb lendong tesashi ka atalokdakja nisung 29 tashi poksetba osang jangjaogo.
Lendong anapronglaji par teloki atalokdaktsü ta PKK teloki tenüng agia metetdaktsüogo.
Ano, Istanbul yimti nung peisasa pokseta asütsü mulungteter kati bomb lendong atalokdakja Germany nunger raliwalir timba densema, nisung 10 shi taküm January ita  poksetdaktsüba osanga jangjaogo.