IT & Communication department-i Mmhonlumo pela agizük

Dimapur, Rongchii 13 (TYO): Department of Information Technology & Communication ajanga iba department indang Advisor, Mmhonlumo Kikon den Rongchii (April) 12, 2018 nü metetpela senden ka amen. Iba senden ya Commissioner & Secretary, K. D. Vizo-i ketdangsüa ani aser pai iba senden nung adenertem pela agizükba den külemi Advisor den-a tepela lemsatep.
Sempet tajung aketba lenir (Advisor)-i bendanga agütsür inyakba ajanga inyakyim balala nung ajangzüktsü aser temelenshi bener arutsü, ta Vizo-isa shisem.
Iba senden nung staff aser ketdangsertem den jempiba mapang, iba department nung shilem ka asüba atema pelar, kechiyong ibai Nagaland indang tarutsü nükla lir, aser asenoki junga inyakra asen kabu nung tarutsü mangdang lir, ta Advisor, Information Technology & Communication, Mmhonlumo Kikon-i ashi.
Tamakok aser tajangshibatem ajanga department-i tarutsü asoshi nükla tajungba nung azüittsü renema alitsüla aser sentongtem inyakba nung staff aser ketdangser ajak kasa bendanga agütsür inyakatsü amanger, aser iba tangatetba ajanga küm pongu tsüngta department melenshitsü aser state-a melenshitsü, ta Mmhonlumo-i ashi.
Department ajanga inyakba tesadang ka inyakra künü anogo parnoki tanga department azüoktettsü, kechiaser information ya shisatsü lir aser mapang ka nung tanga department temi iba department nung metaloka alitsü, ta Advisor-isa ashi.
Kikon-isa ashiba agi, Nagaland ya state tila ka asünung shilem tulu agir aika yangi arua mapa balala inyaktsü mejangratsü, saka parnok koktettsü asenok dak tashi lir, aser asenoki asen tashi ya tarutsü nung rangloker amshira asenoki mapa inyaktettsü.
Training ya kanga tongtibang lir, anungji workshop, conference mesüra seminar tem nung sen indoktsü, kechiaser technology putu den kasa alitsü ya kanga tongtibang lir, ibaji mesüra nisung ka atsüngzüka aor, anungji shisatsü renlokdaktsütsü merangtsüla, ta pai-sa ashi.
Asenoki ajakbo meinyaktettsü, saka asenoki kechi inyakteter, aji junga inyaktsüla. State ajungtsü mechi aser state tarutsü atema asenoki tajungtiba nung inyaktetba mapa nung temulung agütsüdi. Department dak takok anguba otsü lira nüburtemi department akhumtsübutsü, ta Advisor-isa iba senden nung shisem.
“Kü indang nükjidongji department den bendanga agütsür tesendaktep tajung nung külemi mapa inyaktsü lir,” ta paisa maneni ashi.