Ita 12 nung DMC-i gari lenmang 12 buba yangluogo

Dimapur, December 22 (TYO) : Mongulbarnü Bank colony nung lenmang lapoktsüba züngsema Dimapur Municipal Council (DMC)-i ita 12 tsüngda Municipal area nung lenmang 12 nung black topping aser renovation mapa inyakogo.
Mapang talangka Bank Colony nung gari lenmang meyanglui liasü aser tang iba lenmang yanglutsübaji kiyongertem atema benjung mapang sempet ama lir.
DMC-i gari lenmang tasazük 1850 feet x 12 feet yangluba den külemi RCC box culvert 10, hume pipe culvert 1, apu tila ka, dustbins 56, drain works with cover slab 16 tashi yanglutsüogo aser ano tang teinyakdak mapa ana joko tatembangleni arudar.
Kong telongjem lir, idakji terenlok aser tejakleni aoba alir ta tanü MLA & Chairman, NIDC Tovihoto Aye-i tanü gari lenmang lapoktsüdang ashi.
Paisa Bank colony nung alirtem longjema aliba atema tenüngsang agütsü aser lokti nung telongjem melira terenlok malitsü, ta Tovihoto-isa shisem.
NPF-i aniba DAN sorkari public ajangzükdaktsütsü atema tenangzükba agia inyaker aser lokti renloktsü atema sorkar nungita yaritsü ayongzüker, ta paisa metetdaktsü.
Toll tax nungi sarutetba sen ajanga DMC-i Dimapur nung alirtem atema nüngdakba mapa inyaktsüteter, ta Dimapur Municipal Council CEO, H Atokhe Aye-i tanü o tatsüka jembidang ashi.
Paisa sorkar aser department dang DMC nem toll tax sarutsü temelaba agütsüba atema pelaba metetdaktsü.
Sentong nung Bank colony GB, R Longkong-i MLA & Chairman, NIDC Tovihoto Aye, CEO DMC Atokhe Aye, EE aser DMC Badal Badra nunger dang gari lenmang takok ngua yanglutsüsa yaritepba atema pelaba metetdaktsü.
Sentong nung Rev. Dr. Thungdemo Ngullie-i temoatsü meshia sarasadem aser Asheto Aye, Executive member, Bank Colony Council-i anküp tepela o jembi.