Ita 2 tain tanur ka tzüsendang tenlaki chirepa nisung 11 asü

New Mexico, September 22 (Agencies): Mexico kübok Atzala nung Mongulbarnü Richter scale nung 7.1 asadangba menoknok anokdang tenlaki ka nung ita ana tain jala ka tzüsenba sentong tagidak liasü aser iba lendong nung lar kinunger 11 tashi asü.
“Tenlaki telung nung nisungtem aoksatepba aser kangshitepbaji kangasa majung liasü” ta Santiago Apostol church putir assistant Lorenzo Sanche-i osangbener dang ashi.
Iba lendong nung tanutsüla tebu den putir aser putir den yariteper na dang kümzük. Tasürtem rongnunug tanur pezü liasü, ta Archdiocese of Puebla-i ashi.
Sanchez-isa ashiba agi, lendong nung kümzükertem jagi kilem chirepdang tenlaki tezüleni. Ajisüaka, tanüngba nisungtem jagi tezüleni moutet.
Tenlaki chirepba sülen rescue mapa inyakertemi nisungtem kümzüktsü bushitepa ao saka idangji kibong ka nungi züngsem 11 sür aliba angu.
Mongulbarnü Mexico tiyongtsülen menoknok tesashia anokdang nisung 230 jungnüa asü aser Mexico City nungbo tesem tuluba ka nung power raksatsü.
Iba lendong nung tanur aika taküm samaogo aser Escuela Enrique Rebsamen school nung kaketshir 25 tashi asü.
Mexico tir Enrique Pena Nieto-ia iba lendong atema anogo asemnü linük ajungai mangyimtsü sangdongogo.