Ita 20 tsüngda DMC-i gari lenmang 20 buba yanglushiogo

Honibarnü Kevijau colony (Lane 7A) gari lenmang lapoktsüba sülen Addl. Director, ATI, Kevekha Kevin Zehol, CEO, DMC Atokhe aser Kevijau Council züngsemtem külemi agiba noksa ka angur.

Dimapur, November 5 (TYO) : Dimapur Municipal Council (DMC)-i Dimapur telongtet nung terenlok mapa aika inyaka arudar, aser tanüa Lhomthi o Kevijau colony nung gari lenmang ana parnoki yanglushia lapoktsüogo.
State sorkari DMC nem toll tax sarutsü temelaba agütsüba sülen, tesüiba ita 20 tsüngda DMC-i gari lenmang repair/construction 20 buba inyakogo.
Tanü Additional Director, ATI, Nagaland, Kevekha Kevin Zehol-i Kevijau colony nung gari lenmang lapoktsüdang kiyonger nem tenüngsang agütsü.
Kevijau colony nung alirtemi gari lenmang yangludang amshitsü atema DMC nem sen lakh 3 tenla agütsü. Iba ya mapa tajung ka lir aser Dimapur nung alirtemi dang masü saka tanga jilatem nung alirtemia mapa tajung ya ajizüktsüla, ta Kevin Zehol-isa ashi.
Sorkar kiojentem indang süra, nübortemi teti aibelena angateter. Asenoki iba tangatetba melenshitsüla aser pei meyong ta bilema anepalutsüla, ta Zehol-isa ashi. Paisa CEO, DMC Atokhe dang pelaba metetdaktsü.
Sentong nung DMC CEO, Atokhe Ayemi-i o jembidang Kevijau aser Lhomthi colony nung alirtem nem tenüngsang agütsü.
“Kiyongertemi yaritepba ajanga iba mapa takok ngua inyaktetogo. DMC kijai mapa inyaka moutettsü, anungji nübortemi teti yariteptsü aser amaliteptsü mepishir” ta paisa ayongzük.
Mapang talangka nungi aginüa aliba ama DMC-i Pranabananda Women’s College tashi approach road yanglushitsüba atema Lhomthi colony nung alirtemia DMC dang pelaba metetdaktsü.