Ita 5 sülen Mokokchung nung ango ayok tenzükogo

Mokokchung, Nov 20 (TYO): Nüburtem asoshi osang tajung kaji taküm küm June ita 25 nungi Mokokchung nung ango shibanger ita pungu jungnüa arur külen, Nov 20 Mungulbarnü nungi tenzüka ayok tenzükogo.
Tanü iba ayokba maparen tenzükdang ango agent kar den Mokokchung CMO nungi inspector, Mokokchung Municipal Council nungi meyonger, Mokokchung Chamber of Commerce and Industries nungi ketdangsürtem densema liasü.
Nov 19 nü ango seret noklang ishika bener atua inüjisa angoji Kohima-i tetendangtsü atema yok. Department-i parnok lap nung tentendangba agir külen miim amshiba kecha mungutet nung ayoktsü melaa liasü, ta osang ajanga angazüker.
Tanü ango ayokba maparen tenzüka mao tsüngda sentong tongmelang ka agidang, yangji adener ketdangsürtemi ango ayokertem aser nüburtemi ita ishika timtem arema sorkar den amalitepa aruba asoshi pelaba den telok balalai iba dak sentakba nung mera balala agia inyakba asoshi pelaba lemsatepa liasü.