Ita 6-7 tsüngda nung internet amshir crore 50 adoktsü nükjidong lir: Prasad

Ita 6-7 tsüngda nung internet amshir crore 50 adoktsü nükjidong lir: Prasad

January 10, 2016 nü Union Minister for Communications & Information Technology, Ravi Shankar Prasad-i BSE ( Bombay Stock Exchange), Mumbai nung nüburtem asoshi angati ‘high-speed Wi-Fi services’ sayatsüba noksa nung angur. 

Mumbai, January 10 (Agencies): Linük tesem 256 nung Wi-Fi hotspots 2,500 enoktsüba den külemi ita 6-7 tsüngda nung internet amshir nisung crore 50 tashi akümtsü linük sorkar sentong lir, ta Telecom Minister Ravi Shankar Prasad-i Deobarnü ashi.
“Tanü asüng mobile amshir crore 100 dak tema kümogo saka internet amshir nisung crore 40 dang lir. Küm 3-4 tashi nungang internet amshir nisung crore 20-30 ajung saka küm ka majung dang nisung crore 30-40 ajung, anungji nisung crore 50 ajungtsü asoshi ni mapang tataktet ka yua lir,” ta Prasad-i Bombay Stock Exchange (BSE)-i nüburtem asoshi angati Wi-Fi service Tata Docomo den lokteper sayaba mapang ashi.
“Tsüngremi mulungba dang süra ita 6-7 tsüngda nung internet amshir nisung crore 50 ajungtsü,” ta pai ashi.
Srokar meyong BSNL-i taruba mongpu tashi nung linük tesem 256 nung Wi-Fi hotspots 2,500 enoktsütsü, ta minister-isa ashi.
Digital India sentong nung sorkar mapatem internet ajanga nüburtem den metetpelatsü atema project kar enoksema lir aser ibaji ajanga nüburtem kanga ajangzüktsü.
“Digital India sentong ajanga linük nung temelenshi tulu bener arutsü aser süngo ayoker den Sali-moko ayokertem asoshia sentong tajung aika densema lir,” ta Prasad-i ashi.
Asia stock exchange rongnung tambutiba BSE nung investor crore 3 tashi lir aser parnok nem parnok meyong postage stamp ka alakteta agütsütsü, ta Prasad-i metetdaktsüogo.

You must be logged in to post a comment Login