Ita 6 tsüngda Afghanistan nung tensa melenshitsü: Ashraf Ghani

Kabul, Luroi/August 02 (Agencies): Afghanistan tir Ashraf Ghani-i, taruba ita trok tsüngda linük nung tensa melenshiba angutsü ta ashiba den yimtitem tekümzükba kübok toktsütsüji sorkar mapa tongtibangtiba lir, ta ashi. Deobarnü virtual cabinet senden ka nung jembiba mapang Ghani-i, taoba küm 20 tsüngda Taliba pur kanga tamajungba kümogo, ta ashi.

“Parnoki yimjiyimjung mesüra terenlok atema kecha tejangraba mali. Onoki yimjung aginer saka parnoki onok bendanga agütsüdaktsüner. Tongbang nung tensa memelenshira parnoki tajangzük akaba sensaksem ka nung shilem magitsü, anungji asenok tamendakdak tejangja ka alitsüla. Iba atema linük ajunga longjemtsü nüngdaker,” ta Ghani-i ashiba ANI sangdong ka ajanga metetdaktsü.

Afghan sepaitemi Deobarnü Taliban nunger camp nung bomb poklokja raraba sülen Ghani-i iba olen lemsatepa liasü. Kasa mapang nung Taliban-ia, Kandahar nung tayimtsü anendak makogo. Taliban puri manger mesangwa tsüngda tayimtsü anendak rocket asem khaloktsü aser par telok nungi otongdar kati ashiba agi, Afghan sorkar sepaitemi tayimtsü amshia parnok amakba nokdangtsü atema iba jenjang agi.

Tayimtsü anendak runway tera raksaba sülen ketdangsürtemi Kandahar nungi tayimtsü ka danga meyoki sota ayu. Tayimtsütem mapang tatsüka lir senzüdaktsü tenzük.

Taliban-isa, Helmand aser Herat indang provincial yimtiba makogo. Sorkari ashiba agi, Afghanistan National Defence and Security Forces (ANDSF)-i linük kübok tesem balala nung Taliban kiralongrartem aika tepsetogo. Herat province nung tayimtsü amshia amakba sülen Taliban pur 200 shi tepsetogo, ta ashi.

Afghanistan security force temi Ghazni, Kandahar, Farah, Jowzjan, Balkh, Samangan, Helmand, Takhar, Kunduz, Baghlan, Kabul aser Kapisa province tem nung Taliban makogo.