Ita 6 tsüngda plastic free Nagaland kümdaktsüdi: Neiphiu Rio

Kohima, Aami (June) 5 (TYO): Nagaland nunga tanü World Environment Day amungdang telok balalai “Beat Plastic Pollution” omen nung ajemdaker awareness campaigns, green rallies, plantation drive aser lectures ayonga agi.
Department of Environment, Forest & Climate Change ketdangsüba nung NBCC Convention Hall nung agiba sentong nung Chief Minister Neiphiu Rio-i ‘plastic free Nagaland’ kümdaktsütsü atema tayongzükba agütsü.
Alima nung plastic ya meinprong ka kümogo kechiyong plastic ajanga kilentzü aodak tangbangtsüba ajanga tzümetsüng timtem adokdaktsür aser tzü atsüngba tesemtem nung mesentem pokteter. Plastic arongba ajanga tango tamajung adoker aser iba ajanga tashidak balala adokdaktsür. Anungji asenoki plastic amshiba anentsüla, ta Rio-i ashi.
Asenoki ‘plastic bags’ amshiba anentsüla aser iba melena ‘reusable cloth bags’ amshitsüla, ta paisa shisem.
Kohima Municipal Corporation (KMC)-i The Environment Protection Act, 1986 kübok Plastic Waste (Management & Handling) Rules 2011 mapa küma inyaker ajisüaka asenoki iba Act tashi itta amshitsü atema osang tejangja prokshitsüla, ta Chief Minister-isa ashi.
Asenoki plastic plates aser cutlery melena aou agi yangluba osettem amshitsü merangtsüla aser ibaji alima den putepba dang masü saka aou dak sendakba wadang ajungkettsü, ta paisa ayongzük.
Taruba ita trok tsüngda ‘plastic free Nagaland’ kümdaktsütsü atema asenoki merangdi aser Luchii (December) 1, 2018 tashi nung iba alizüng tongtettsü atema State Chief Secretary dang task force ka tentettsü mepishir, ta Rio-isa ashi.
People’s Democratic Alliance sorkar indang election manifesto nung shia aliba ama sorkari ita asem tsüngda ‘clean and green Nagaland’ campaign tenzüktsü. Iba dak sendakba nung Delhi nung NDA sorkar küm pezü ajungba tenüng nung PDA sorkari taruba hopta ka tsüngda campaign mode nung süngdong 48,000 atemtsü, ta Neiphiu Rio-isa metetdaktsü.
Sentong nung Environment, Forest & Climate Change & Parliamentary Affairs Minister, C. M. Chang-ia o jembidang, iba anogo nung nisung ajak longjemtsü aser alima asoshi tayongzükba tulutiba rongnung ka anema raratsü ayongzüker, ta ashi.
Department of Environment, Forest & Climate Change den yaritepa Nagaland Science & Technology Council-i Environment indang School Tool Kit and Teacher’s manual ka saya.
Nagaland Legislative Assembly Speaker, Vikho-o Yhoshu-i ‘green pledge’ agidaktsü aser Dreams Unlimited ajanga shishilembadang plastics mamshitsüba indang jilushi ka ia sayu.
Class-X ser teküpok atema State Level Poster tetoktepba agiba nung Town Higher Secondary School, Mokokchung nungi Marnungba (Class IX)-i mezüngbuba jenjang angu. Tanabuba jenjang nung Holy Family Higher Secondary School, Kohima nungi Pipito Awomi (Class X) aser tasembuba nung North field, Kohima nungi Atuna Shikhu (Class X) nati takok angu.
Sentong nung mendenji Department of EFCC Secretary, Imtienla Ao liasü aser Youth Secretary & NBCC Sanitation & Environment Committee Co convener, Rev. Vikuo Rhi-i temoatsü meshia sarasadem.
Tanep Department-i “green march” ayonga agiba nung school 31 nungi kaketshir 1800 shi aden. Parnoki Secretariat Junction nungi NBCC Convention Hall tashi jaja aser iba sentong nung Don Bosco Higher Secondary School Principal Father Vincent-i temoatsü meshia sarasadem.
Kaketshirtem kanga longsoa shilem agiba atema Principal Chief Conservator of Forest, I. Panger-i pelaba metetdaktsü aser paisa kaketshirtem dang ‘plastic free’ alima kümdaktsütsü atema ayongzük.