Ita 9 tanur tetsüka mi agi rongset

Guwahati, December 18 (Agencies): Kanga dang taoksatsü tatalokba ka nung Nagaon kübok Raidangia tesem nung ita teku tanur tetsüka kidangeri mi senokja rongsetogo.
Osang ajanga ashiba agi, tanur tetsü ya Purnima Das ta jangjaogo, shiba Brehostibar aonung lar kidanger Bintu Das den mangatettep adoka liasü. Iba sülen la aonung lar kimai tzü indoki aluba mapang nung Bintu-i la dak kerosin shiloktsü aser mi senoka la rongdaktsü. Iba tatalokba sülen lar kinungertemi la temang kanga mejungi ronger lia ngutet, aser mozüki-i anri ao. Aji süaka la temang kanga mejungi rongadoker aliba ajanga mekümzükteti mozükidangji süadok.
Iba tatalokba dak sendakba nung Bintu Das anema Purnima’er kinungertemi Jajori Police Station nung ken o ka benokogo. Maneni kasa ken o dak sendakba nung police temi abelena alisang aputsü asoshi kecha tejangraba mesayuba reprangtetba sülen local temi iba anema nokdak, aser aija alisang pua tapet temerenshi agütsütsü asoshi akhang.