Ita ana tsüngda mezüngbuba Rafale agütsütsü: Ziegler

Bhopal, July 05 (Agencies): Hokolbarnü France Ambassador to India, Alexandre Ziegler-i, ita ana tsüngda India nem mezüngbuba Rafale fighter tayimtsü agütsütsü aser ibaji mapang tetemsü nung agütsür asütsü, ta metetdaktsü.
Bhopal nung sentong ka alidang osangbenertem den jembidang pai, taruba küm ana tsüngda Indian Air Force (IAF) nem Rafale tayimtsü 36 prongla agütsütsü, ta metetdaktsü.
Iba tayimtsü ya kanga junger, anungji iba tayimtsü ajanga Indian Air Force tashi itshitsü, ta shia Ziegler-i, “Mezüngbuba Rafale tayimtsüji tang nungi tenzüka ita ana tsüngda IAF nem agütsütsü, ni bilemer September itaji tetemsü asütsü. Küm ana tsüngda tashi nungbo tayimtsü 36 prongla agütsütsü,” ta metetdaktsü.
India aser France na tesendaktep junga lir ta shia Ziegler-i, “Tesüiba küm 50 tsüngda onoki India den tesendaktep ayuba jenjang reprangdangang. IAF-i French technology aser India-French technology amshia ayimer, kechiyong asenoki technology aika adoktetogo,” ta ashi.
Rafale dak sendakba nung France Ambassador-isa, “Rafale ya tayimtsü tajung ka lir, aser India-i iba tayimtsü shimba atema onok nüma atanger. Iba tayimtsü ajanga Indian Air Force tashi itshitsü,” ta ashi.
India-i Rafale tayimtsü alizükba dak sendakba nung mangatettep ken o tulu adoka aliba dak sendakba tasüngdangba ka langzüdang pai, “Iba mangatettep atema ni kecha tejangraba mali,” ta ashi.
India-French partnership dak sendakba nung Ziegler-i, “Onoki India den partnership junga yanglua lir. Iba ya asalentong partnership ka lir; iba nungji security onüktem, defence, space nung amalitep aser tanga onük aika densema lir,” ta ashi.