Ita asem lir Lion Air Jet indang cockpit voice recorder ngutetogo

Jakarta, Aenjeti/Jan. 14 (Agencies): Taoba Mongputeni/October nung tsükokba Lion Air jet indang cockpit voice recorder ngutetogo, ta Indonesia ketdangsertemi Tentonü sangdongogo, aser iba oset ngutetba ajanga tayimtsü tasen ali nungi apusor mapang tasüka tsüngta tsükokba indang kuli bushiba nung teyari agütsütsü.
Boeing 737 Max ya Jakarta nungi apusor minute 13 shi dang lir radar nungi sama aser pilot temi iba tayimtsü Indonesia yimtibai tanaben meyipa arutsü asüngdanger mapang tatsüka tsüngta Java Sea nung tsükoka yangji mena alir nisung ajak (189) asü.
Iba box ya Tentonü anepbongi ngutet, ta Indonesia National Transportation Safety Committee (NTSC) deputy head, Haryo Satmiko-i osangbener dang ashi.
Bushisüngdanger temi Boeing 737 Max tayimtsü data recorder bo tamalen nguteta liasü, koba ajanga Mongputeni/October 29 nü tsükokba tayimtsü indang speed, altitude aser pa aoba lenmang metetdaktsür.
Iba tayimtsü tsükokba indang mezüng bushisüngdangba osang sangdongba agi, pilot temi Flight 610 indang anti-stalling system azüoktsü timtema liasü ta bushitet.
Lion Air jet ya technical timtem kar liasü saka iba timtem anepalu mesüi anüng nung jajadaktsü, ta bushisüngdanger temi ashi.
Iba tayimtsü tsükokba osang tejangja ya küm tatemlen ang renemtettsü amai lir.
Iba voice recorder, koba dang black box ta ajar, iba hadir ya data recorder ngutetba tesem nungi meter ter shi bilar ngutet, ta iba tayimtsü tsükokba bushir lennir Isswarto-i ashi.
Iba oset ya tzüyim tarok mesüra tatsük nunga mesamar aser ita ka tashi signal agütsür.
Black box data teyari ajanga tayimtsü tsükokba kuli shilem 90 jungnüa metetdaktsür, ta tayimtsü mongintemi ashir.
Ketdangsertemi iba tayimtsü tsükokba nungi asür nisung 125 dang jangjateter Yimpoksüi/November nung anen, saka asür kinungertemi mepeshiba sülen Lion ajanga sen million $2.6 indoka Dutch company ka anir arua iba tayimtsü nung asürtem jangjatsü maparen tanaben tenzüka inyakdagi.