Ita aser Anogo züngya

~ A. Maong Aier Rtd. G/T, Alongmen Ward, Mkg.

Ita aser anogo züngya atema kü o tatsü agi yamai lemsateper. Alemli otsüla oboula nungeri ita aser anü dang zonizüng ta jaa aru ta züngshia ni angashiba ka yamai jangjatsür. Zoni nüngja ya mongsen oshi o tarok lir. Iba ya anü dang ajar. Ita jibo ita ta dang jaa aru. Zoni olong ya ken aser sangro nung angutsü. Anungji ita züngya ta ang asütsüla. Zoni tetezü anü. Iba nungi zonizüng tetetzü anogo züngdangba. Süra hopta ka nung anogo tenet ya ang zonizüng ta ajatsüla. Ni ashiba ya mamangra tantsü tambu khar dang asüngdangang. Moluk adakdang nükmen tai nung inokra medaktetsü. Anungji ita züngya aser zonizüng ta melenshi nung tajungba asütsü.
Item züngya ya tajungtiba nung liromedema adoktettsü atema temettetsü aser tajungshi o khar yamai tadongi shiyonga alur.
1. Engraji nung o anaba olasü aser tongmelang agi JANUARY aser DECEMBER ta amshiba ama asenoka ANJET aser LUSHI ta dang amshi nung jungdisü?
2. Asen Ao lima tila ka nung oshi balala tsüngkem mongpu balala, inyaksangshi mapang balala, saka iba ya liromedema adoktettsü atema takoktsü lenmangji aika lir. Khari December ita alu achir, khari January ita nungang achi, saka January itaji ANJET ta amshira, December itaji LUCHI ta amshi nung liroji medemer ta angatettsüla.
3. Nükpoker troki shiti mang tesem balala nung kongshir ni ashibang shitak ta tokteper tatem nungbo shiti mang telemsa liasüba ama, asen calendar ya tapu trok tenet ka züngshiogo. Item ajak nung khar aibelenba dak alaka tanungbabo shitak ta züngshiogo. Anungji shiti mang tesem balala ajak meyokteper shitimang ka kümtetba ama calendar ya tajungtiba nung adoktsü merangdangdima.
4. Item ya tanü aser tarutsü putu asoshi renema yuner asünung mapang indok mesasai, meilongi kümdanga asemba jagi alizüngji tongtettsü ta asüba shin o bilemteta inyakdima.
5. Item ya adokdang Orrlem ozüng shitak amshitsüla, February ita dang TSüKLAI ta ajaba ya tatalokba tai. METSÜREMI: tasümang aser oset tamangjung ali tur aremer, saka metsübo proker mesüra azünger ta asü nungang oshiji meraksar.
6. Zonizüng nung BENJA NÜ aser AMONG NÜ yabo kanga junger. Akhi otsüla oboula nungiri jatetba olong dang ajunga mamshii, Dr. Clark nungeri AMONGNU ta jatsüba yaa junger. Anogo trok mapa inyaker tenetnü buba meshiteta amonger asünung AMONGNÜ ta aja nung shir kini yabo tai ta ashitsü. Anu January itaji küm tasen itai ayaoker asünung KÜMSEN ta amshiyonga shibai tai aputsü.
OTEMBANG: Item züngya ya shitakba nung liromdema adoktettsü atema ita shia tatalokba aser inyaksangshi shitak den calendar ajak nungi olasü tatsüba aser tajungba shima adoktsüla. ASLB-i inyakba taitem ni angatetba agi lemsatepogo, parnoki shitak inyakbatembo shitak ta nia parnok medentsür. Item mapa ya atema tanga tesüa nenok mapa asünung tajungtiba nung adoka nüburtem den lemsateptsü yongyaseta atar aser nüburtemia ASLB den amalitepangma ta shi kü onük tembanger.
NB: Item mapa ya shitakbaji madoktet tashi paper nunga mamshii ata nung tajungba asütsü.