Ita shia amenba Wokha DPDB senden ayonga menogo

Wokha, Metsüremi/March 01, 2019: Ita shia amenba Wokha District Planning and Development Board (DPDB) senden February 28, 2019 nü Pangti Village Community Hall nung amenba mapang nung tangokba noksa nung angur. 

Wokha, March 01 (TYO): Ita shia amenba Wokha District Planning and Development Board (DPDB) senden February 28, 2019 nü Pangti Village Community Hall nung menogo; iba senden ya Vice Chairman DPDB & DC Wokha, Dr. Manazir Jeelani Samoon, IAS leniba nung amen, ta tanü ketdangsertem osang ka ajanga metetdaktsü.
Senden nung Board züngsemtemi Wokha district kübok Aspiration RD Block agizüktsü aema o lemtep, aser o tatsütalang lemtepba sülen aspirational block atema Champang RD Block benoktsü alemteta liasü.
Yanmhon EAC Post onük nung board-i tekaratiba nung agizüktsü atema sorkar nem nenshia metetdaktsütsü lemtet.
Sungro PHC terenlok dak sendakba nung Chief Medical Officer Wokha, Dr. Robin Lotha-i züngsemtem dang Sungro PHC indang metetdakja, “Wokha district kübok Sungro PHC ya tejentiba health center lir aser iba centre-i yim trok ayimjemer,” ta ashi.
Paisa, Sungro PHC nung infrastructure junga maliba aser kiojen majungba ajanga nüngdakba facilities magutsüateter, koba ajanga iba range nung aliba nüburtem nem health care agutsüba nung tetesükdaktsü adoker, ta metetdaktsü.
Iba dak sendakba nung chairman-i iba centre terenlok atema taruba senden nung osang tejangja agujang, ta mepishi.
V/chairman-i DPDB züngsem ajak dang Wokha nung 28buba Naga Students Federation (NSF) mongdang takok ngua katettsü atema Lotha Students Union (LSU) nungita yaritsü ayongzük.
Senden nung District Forest Officer, Zuthunglo Patton (IFS)-i Tourism & Forest Department-i inyaka aruba osangtem metetdaktsü.
Iba dak sendakba nung lai, Nagaland nung shiti nütsüng shilem asem nungi shilem anabo Wokha District nung lir, aser tawa arem shiti-i nisung yirutsüba/tepsetba aser alu raksatsüba ya tebilemtsü tuluka lir, ta metetdaktsü.