Italy anülulentip tsütsülen refugee nisung 1,000 shi kümzük: UN

Italy kübok Sicily anasa, Mediterranean Sea nung Italy’er tzüyim sepaitemi rong tila nung amener refugee aser migrant nisungtem tzüyimkümleni meiner aoba noksa nung angur. Italy’er tzüyim miktartemi refugee nisung 1,000 shi tzüyim nungi kümzükba osang ka United Nations (UN)-i metetdaktsüogo. (Sicily, May 14)

Geneva, May 14 (Agencies): Italy’er tzüyim mitkartemi par linük anülulentip tsütsülen tzüyim nung refugee aser migrant nisung 1,000 shi yashi, Hokolbar nü kümzükba osang ka United Nations (UN)-i tanü, Honibar nü metetdaktsüogo.
European border mangament agency, Frontex-i ayonger tan Mediterranean Sea nung refugee nisungtem kümzükba mapatongji inyak aser iba mapatong nung shilem agir Italy tzüyim sepaitemi Cape Passero southeast tsütsülen, Sicily anasa tzüyim nung rong 2 nung mejeptepa mena alir refugee nisungtemji kümzüka liasü.
“Tan kümzükertemi anogo ishika tejaklen Eygpt toktsür Europe bushia ayamesoba osang jangjaogo. Parnok ajunga kechi nisungtem lir iba osang tang tashi mejangjateti lir saka parnok rong nung Syria aser Iraq nungertem densemba osang bushitetogo,” ta United Nations High Commissioner for Refugees (UNHCR) otongdar, William Spindler-i osang jangjashitsü.
“Egypt toktsüba refugee nisungtem den külemi, Libya nungi Europe bushia rong tila nung ayamesor refugee nisungtema tzüyim nungisa kümzüka anitetba osang jangjaogo,” ta pai shisem.
Paisa ashiba agi, tan kümzükba refugee nisungtem anepalutsü aser parnok nem nungdakba teyari agütsütsü asoshi UN kedangsertem tesem balalai yokogo.
Taküm, 2016 küm tenzüker tanü tashi nung refugee aser migrant nisung 190,000 shi tzüyim ajanga Europe tonga aoba osang bushitetba osang ka UNHCR-isa metetdaktsüogo.
Ano külen, Germany sorkari refugee nisungtem anepalutsü asoshi 2020 küm tashi nung euro sen billion 93.6 shi indoktsü renemba osang ka metetdaktsüogo.
“Taküm küm kisüng nung refugee nisung 600,000-i Germany bushitsü akok,” ta Germany’er finance ministry-ia metetdaktsüogo.