Italy Ato Kilonser, Matteo Renzi-i Cuba semdanger

Cuba Tir, Raul Castro (Achijilen) aser Italy Ato Kilonser, Matteo Renzi nati Cuba yimtiba Havana kübok Revolution Palace kilung nung ajurutepa senden amenba noksa ka yangi angur. (Havana, October 29)

 Havana, October 29 (Agencies): Cuba linük den shishilembatsü tesendaktep junga yanglutsü nükjidong nung Italy Ato Kilonser, Matteo Renzi-i yashi, Bodbar nü nungi tenzüka Cuba linük semdangtsü tenzüka lir.

Cuba linüki United States aser Europe na den sentaktepshitsü tenzükshiba mapang ka nung Renzi-i tan mezüngsüa Cuba linük semdanger lir.

“Italy nung tentetba shishilembatsü telok aser tentettemi Cuba nung shishilembatsü tejangraba lir,” ta tan Mongolbar aonung Cuba tonga aosang, Renzi-i metetdaktsü.

Renzi-i Cuba Tir, Raul Castro den ajurutepa senden amendang Cuba’er raliwalitsüren, shishilembabaren, kisu jensü aser osettsüset tanaben tasen küma yanglutsüren nung par Italy-i tongti shilem agitsü jangraba olen lemsatepa liasü.

Küm 50 shi tesendaktep kanga mejungi lir külen US o Cuba nati tanaben sentaktepshitsü tenzükba ngua, Italy densema Europe nung tentetba linüktemi Cuba den tesendaktep junga yanglutsü maparen tang tenzüka lir.

Renzi-i Cuba semdangba jakdang, France Tir, Francois Hollande-ia taküm May ita Cuba semdanga liasü.

Renzi-i Chile, Peru aser Colombia linüktem semdangba densemba Latin America semdangtsüren tembanga tan Cuba semdanger lir.