Italy menoknok nung asür 247 jungogo

Accumoli, (Italy), August 25 (Agencies): Bodhbarnü Italy nung menoknok tesashi ka anokba lendong nung asürtem 247 jungogo aser ano maneni tenem nung aliba yimtsüngtem nung tasümang aika angutsü südi, ta osang ka ajanga metetdaktsü.
Yashi iba lendong atalokba sülen nisung aika pei gari, semtu aser anasa aliba kinüngtertem kidang jenoka mejanga liasü.
Tanü Amatrice jila nung tetsür ka tenüng agi Monica-i, “Onok gari nung mejanga liasü aser aonung piyong menoknok aiben anok. Menoknok tesashi ka anokdangbo gari ajak arakzüa anokshi,” ta ashi.
Bodhbarnep Acculoli aser Amatrice jila nung 6.2 asadangba menoknokji ali telunglen kilometer 4 iir anoka liasü.
Civil Protection agency-i ashiba agi, nisung 247 asüba dak alia nisung 264 kanga mejungi yirua lir.
2009 küm-a Italy nung Umbria, Marche aser Lazio tesemtem nung menoknok tesashi ka anoka liasü, aser iba lendong nung nisung 300 shi taküm sama.
Iba küm menoknok anokba sülen ghonda 72 nungang L’Aquila anasa tesüsabuba nisung ka kümzüka liasü, aser iba nungji ajemdaker kümzükba maparen inyakertemi teimla mesamai akumlirtem karbo kümzüktsü südi ta imlaa maneni bushidar.