Italy nung ano menoknok ka anok

Rome, November 03, (Agencies) : Italy nung tawa menoknok anokba tesem nungsa  Brihostibarnüa ano Richter Scale 5 nung menoknok anokogo, ta US Geological Survey (USGS) osang ajanga metetdaktsü.
USGS-i, iba menoknok ya ali telunglen kilometre 10 (mile 6.2) lur anok aser menoknok tiyongtsüji Italy kübok Perugia jila anüolentip tsütsü anüdoklen nungi kilometre 51.5 (mile 32) pilar liasü, ta Guardian osang ajanga metetdaktsü.
Menoknok magnitude 5.0 ya kangara tesashibo masü ta züngshir, ajisüaka iba yagi teraksabo yaria adokdaktsür. Tang ama ali telungleni kanga melui anokba menoknoktem yagi ali tema nung teraksa kanga adokdaktsür.
Hotpa ka tejakdang iba kasa tesem nung 5.5 aser 6.1 mangnitude tem nung menoknok anokba sülen taoba Deobarnü-a  6.6 magnitude nung menoknok tesashi ka anok aser ibaji Italy nung küm 36 tsüngda anokba menoknok rongnung tesashitiba lir.
Deobarnü anokba menoknok agi Apennine tenemlen aliba jila aser yim tejentem samatsü aser nisung 15,000 tashi talidak makai prokshiogo.
Italy nung item menoknoktem yagi Umbria, Marche aser Amatrice jila nung August ita menoknok tesashi anoka nisung 300 tashi asüba Lazio tesemtem nung takoksa kanga mejungi adokdaktsüogo.