Italy nung menoknok tesashi anok

Deobarnü L’Aquila, Italy nung menoknok agi raksatsür aliba ki ka noksa nung angur.

Rome, October 30 (Agencies) : Anaben tashi menoknok anoker aliba tesem, central Italy nung Deobarnüa ano menoknok tesashi ka anoka kiojen jenti raksaja nisung aika talidak makai kümogo. August ita nung menoknok anokdang nisung 300 shi asüba tesem nung ano tan menoknok agia teraksa tasen aika bener arutsüogo.
Italy national geophysical aser volcanology institute-i iba menoknokji magnitude 6.5 nung anok ta ashir. Iba lendong anepdang 7:41 nung atalok aser menoknok tiyongtsüji Norcia anasa liasü. Iba menoknok tesashiji Italy anüdoklentip aliba Bolzano aser anüolen Puglia tashi nunga metet, ta Italy osangkakettem ajanga metetdaktsü.
Iba tesem nung aliba jila timba ka menoknok anoktsü osang meteta jelia azüngteter liasü anungji tan lendong nung asüba osang tang tashi nungbo ano ka tanga mali.
Italy civil protection department nung tekolakba, Fabrizio Curcio-i, “Iba menoknok anoker gondha 4 lir külen nisung 20 shi yiruba osang angashiba dak alaka asüba osang ano mangashi. Ibai kanga nüngdaka aliba menoknok ka liasü,” ta ashi.
Gari lenmang raksaba ajanga lendong nung yirur alirtem helicopter nung mozüki bushia anir ao.
Search & rescue team tem iba tesem nung mazüngi inyakdar aser mayor temi jila tila nung alirtem tia asadangdar, ta Curcio-i shisem.
Ki meyirjang aika nung light mali aküm, kechisarena chirepa laoba ajanga gari lenmang nokdangatok aser kanga dang tongtibang highway, Salaria nung gari mejajateti aküm, ta  Curcio-i ashi.
Menoknok tesashi anokzüker külen ano maneni anokzüba ajanga teyari mapa kanga sadema meinyakteti liasü.
Menoknok tiyong anasa aliba jila, Ussita nung aliba ki noklang nung shilem 90 tashi chirepogo, ta Mayor Marco Rinaldi-i Italy Television osang nung metetdaktsü.
August ita menoknok anokdang kanga mejungi kongshiba jila, Amatrice nung aliba tenla ki, Sant’Agostino tejaka chirepa tsük.
“Ajak raksaogo, jila tem mali kümogo,” ta Arquata del Tronto nung mayor Aleandro Petrucci-i ashi.
Rome nung aliba tongtibang subway anaprong raksaa ali mali tendangtsü asoshi khen atema shibanga lir, ta Italy nung osangbenertemi ashi.
Menoknok anokba sülen aika ki mali kümogo aser tang parnok kidanger jilatem nung aliba hotel tem nung jenoka lir, saka karbo pei ki anasa alitsü mulungteter gari nung ayiper.