Italy nunger film yanglur Ettore Scola süogo

January 21, 2016 : Italy cinema nung küm semer dak tema nüburtemi kanga sapua aser meteta alisang Ettore Scola arishi küm 84 nung iba lima nungi pilaogo, ta par kibong sangdong ka ajanga metetdaktsüogo.
Scola ya Deobarnü Rome polyclinic nung temulungjang operation agiba tesemi anir aoba sülen nungi joko kecha memeteti kümer liasü aser Mongulbarnü süadok, ta kasa sangdong ajanga Bodhbarnü ashi.
Italy sorkar nung tekolaksang, Matteo Renzi-i, “Scola ji Italy nung temelenshi adokbatem metetdaktsür nisung ka liasü aser pa iba lima nungi pilaba ajanga linük nung tapok tulu ka adoker,” ta twitter ajanga lemsatep.
Scola-i film 40 dak tema director süogo aser item rongnung 1974 küm yangluba Nino Manfredi, Vittorio Gassman aser Stefania Sandrelli nungeri shilem agiba “We All Loved Each Other So Much” film kanga nüngtugu aküm.
Iba den külemi 1977 küm yangluba, Marcello Mastroianni-i shilem agiba film ‘A Special Day’ film oscar atema tenüng benoka liasü.
Scola 2011 küm mapa nungi anisüngzük ajisüaka pai par tembar aser pa dang shisa tuyur, director, 1993 küm asüsang, Federico Fellini indang otsü, ‘How Strange to be Named Federico’ 2013 küm yanglutsü.