Italy train lendong nung nisung 20 shi asü

Rome, July 12 (Agencies) : Takdang pezüzü keta aliba train ana lenmang ka nung tsüktep saka train ana nungji nung nisung kwi mena liasüar mejangja, ta Italy Fire Brigade/EPA osang janga metetdaktsü.

July 12, 2016 nü Italy anülolentip tsütsü item passenger amenba train ana tsüktepba lendong nung tajemba agi nisung 20 asü aser aika yirur lir, ta Fire Brigade ketdangsertemi metetdaktsü.

Iba lendong ya Corato aser Andria jila na yongtsü nung atalok.

Anünglen nungi iba train ana chitepa tsüteper train lenmang tezüh anatsülen train raksa merepshir aliba tangoka lir.

“Train tem nung aliba takdangtem lapoktsü atema onok rescue team aika den külemi inyakdar,” ta fire service otongdar Luca Cari-i ashi. Onoki train ana rongnung ka nungi tebur chanu kabo kümzükogo, ta pai shisem.

Puglia region nung Italy mapang 11:30 ako nung tsüktepba train ana ya koma ser atalokar ano osang tejangja memetetdaktsü. Bilemtsü agi nisunger aibelen ajanga lendong ya atalok asütsü südi kechiba süra bushisüngdangertemia meimchir aibelen ajanga iba lendong atalok asütsü akok, ta AFP osangbenertem dang shiogo.

Train ana rongnung ya kabo, ka mesüitem tashi station nung signal tanen ata alitsüba asü, ta bushisüngdangertemi osang ajanga metetdaktsü.

Ato Kilonser Matteo Renzi-i, “Iba lendong atalokba osang tejangja mangu tashi telung tonga ia bushitsü,” ta shiogo.

“Tang ya nüktzü yima tasümang aser yirur aliba nisungtem bushiba mapang ka lir,” ta pai ashi. Iba lendong atalokba ajanag pa Milan nung oa amongtsü mapang tera  ajemshiogo.

Tanü train ana tsüktepba lenmang ya regional rail company Ferrotramviaria-i repranger.

Viareggio, Italy nung 2009 küm train lendong ka ajanga nisung 30 taküm samatsüba sülen tan mezüng iba lendong ataloker asütsü.