Italy:Mozükidang inyakertem mapai maoba atema apu

Rome, February 24 (Agencies) : Hokolbarnü Italy nung mozü meteter mongintem tajemba agi parnok nisung 55 mapai maru sürnung mapai arur ama bilemdaktsütsü tiyazü mapang ashiba atema pua ayu, ta police-i ashi.
Police sangdong ka ajanga ashiba agi, tang pua alirtem rongnungji neurologist ka, gynecologist ka, radiologists 9, nurses 18, administrative mapa inyaker parnoki 6, maintenance technician parnok 9 aser health & social worker parnok 11 dena lir. Parnok ya Loreto Mare hospital, Naples nung inyaka liasü aser public prosecutor office tetuyuba kübok parnok house arrest süa ayutsü, ta osangbenertemi metetdaktsü.
“Gondha sa Gondha itdanga anishiba sülen aser video 500 dak tema nung parnok tsüngsü apuba sülen item mongintem mapai maoba putet. Iba dak sendakba nung tajemba agi nisung 94 densema lir,” ta kasa sangdong ajanga ashi.
Doctor tem rongnung kabo, tennis asayaba, senti oset aliba aser nijatemi ajaba mapalen senzüba putet, ta police-i ashi.
Ano doctor kabo anasa aliba hotel ka nunga chef mapa inyakba ngutet.
Iba bushisüngdang mapa ya küm ana tejakdang nungi tenzüka liasü aser parnok tsüngsü aputsü atema mozü kidang tesem tesem nung camera miima inoka yutsü.
Item camera ajanga nisung aikati mapa nung oa sign süli oatokba aser karbo maru sürnung medemertemi sign sütsüba putet.
Sangdong ajanga ashiba agi, nisung anatibo parnok külemi inyaker tajemba agi nisung 20 atemasa sign asü.
Iba inyakyim ya Italy nung kanga bulua kümogo aser ibaji ajanga sorkari parnok mapa inyakertem mapa nungi idangjisa mapa nungi anendaktsütsüsa akümer.