Itasen aikaji teperi masü, lokti atema inyaktsüla: Tir Pranab

New Delhi, September 07 (Agencies): IITs aser NITs ama tongtibang rejutem nungi graduate asür kaketshirtemi itasen aika ngua jangratema alibaji  teperi ama mebilemtsüla, saka lokti atema inyaktsüla, ta tanü Tir, Pranab Mukherjee-i ashi.
Tanü National Institute of Technology (NIT), Delhi convocation nung jembidang Pranab-i,  item lanur aser lanutsürtemi takok angubaji parnoki pei lokti aser linük ajangzüktsü atema inyakba agi dang asadangtsü, ta ashi.
“Nenoki shisatsü angubaji na jangratema alitsü mesüra itasen aika achitsü atema dang masütsüla,” ta pai ashi.
“Ajisüaka atangji, NITs aser IITs nungi engineering graduate temji iba dang nungia alia asütsüla. Nenoki takok angubaji nai sen kwi aazüker aser ner kibong nem koma taküm ka agütsür, iba kijaji agi dangbo masadangtsü, saka iba dak alia lir,” ta pai ashi.
Tirisa, “Nai kaket kwi azünger, nai research atema kechi meratemsa agir, scientific aser technological shisatsü nung ajemdaker nai ner lokti nem kechi tajangzüktemsa agütsür. First grade engineering aser technical institutions nungi  kaketshirtem (takokji) itemji agi  asadangtsü,” ta ashi.
Mukherjee-isa, tanü convocation sentong tembangba sülen kaketshirtemi tetoktepba lima balala nung alitsü, ajisüaka nenoki tasümeiti malitsüla, ta ayongzük.
“Nenoki anguba shisatsütem ajanga alima nung timtem aser tayongzükba balala tasüieta koktettsü,” ta pai computer science, electronics aser communication engineering ama stream balala nungi takok angur kaketshirtem dang ashi.
Mukherjee ya yimtenren nung majemokdang tesayur ka liasü aser pai lanurtem dang, nenoki anguba shisatsü ajanga ajemalua alitsü tashi angutsü, ta ashi.
“Nai taküm nung ajak angazükogo ta kodanga mebilemtsüla. Taküm nung nenoki anogoshia angazüktsü. Iba (tangazükba) ya tatembang maka,” ta paisa ashi.
Iba sentong nungsa NIT Director, Ajay K Sharma-i 2010 küm iba reju tenzükba otsü tatongi ashi aser Tiri toppers nem gold medals aser Director’s medal lema agütsü.