Itasen aser teyari junga manguba mechi Nigeria doctor tem longkak aiter

Abuja, Luroi/August 02 (Agencies): Itasen, insurance teyari aser ki-o-jen shidak magütsütetba mechi Nigeria sorkar meyong mozüki nung doctor tem longkak ait tenzükogo, kong coronavirus wave tasembuba tenzüka lir.

Africa nung nütsüng yongsük timtiba aliba linük, Nigeria nung doctor shilem 40 shi aliba National Association of Resident Doctors (NARD) ajanga longkak aitba ya Hombarnü tenzük, koba medical staff temi aiben mapa inyakba anena aruba rongnung ibai tasenba alitsü.

“Linük tesem ajungalen longkak aitba ya anepdang 8:00 ako nung tenzük. Ibai mapang lateta mali. COVID-19 anepaluba doctor tema tatok mali,” ta NARD tir Uyilawa Okhuaihesuyi-i osangbener dang ashi.

Itasen tagütsütsü tim magütsüba, lemndong timtem ajurudang teyari agütsüba aser virus agi asüba doctor tem indang kinunger nem insurance teyari agütsütsü züngzüktepba sorkar nem metsünga-reta agidaktsütsü mechi iba mera ya agir, ta pai ashi.

“Mapa inyakba mapang asüba ozü züngsem 19 nem insurance teyari agüjang ta sorkar dang onoki asüngdanger,” ta pai ashi.

Okhuaihesuyi-i ashiba agi, Nigeria doctor tem kabu nung hadir tajung mali, mapa dak alang sen magütsür aser sorkar meyong mozüki nung ki-o-jen teraksar.

State kar nungbo ita aika indang itasen aser danga teyari magütsü lir, aser union ajanga akhangba mataloktsü tashi longkak aitba manentsü, ta pai ashi.

“Nigeria nunger dang onok dang aremzüktsü mepishir. Doctor aser parnok kibongtem tim atemer. Sorkari temolung magütsüba aser onok senzüka yutsüba ajanga onoki joko sentsüh memonokteter.”

Nigeria nung doctor 42,000 shi lir, aser item rongnung 16,000 bo residents – medical school graduates tem specialist ama training agir.

Mozüki nung yipten aser mozü agi anüngba aser tashidak wara balala nungi kumzüka aliba hadir peria maliba indang doctor temi mapang talangka nungi ashishitepa arur. Parnoki life insurance, itasen timba kumtsütsü aser taa tabu balala menoktsü atema akhanger.

Taoba mapanga doctor temi kasa onük nung ajemdaker mapa inyakba anena atatsü sangdonga sorkar meyong mozüki nung inyaksangshi ajak anena liasü.

April ita nunga anogo ter longkak aittsü asoshi union ajanga jazüka liasü. Iba mapang health services aser danga inyaksangshi nung tetsükdaktsü ajurua liasü.

Nigeria nung nütsüng yongsük million 210 lir, aser iba linük nung 2020 küm February ita COVID-19 mezüng putetba sülen tang tashinung iba virus yagi nisung 174,315 menepogo aser nisung 2,149 süogo, Ajisüaka tesem kar nungbo iba tashidak agi meneper ya kanga agi timba alitsü südi, ta amanger, kechiaser iba tashidak tendangba kanga ajema lir.

Taoba ita Nigeria Centre for Disease Control ajanga tali tezüpaba menatepa aoba Delta variant putet, ta sangdonga linük nung wave tasembuba tenzütsü akok ta ketdangsürtem tali saksalema lir.