Itasen nung tali intokba yong terenlok mapa meinyakteter: CM Lizietsu

12 buba Nagaland Legislative Assembly 15 buba senden tatembangbuba anogo nung tatartem adenshidak angur. March  30, 2017.

Kohima, March 30 (TYO): Tanü Nagaland Chief Minister, Dr Shurhozelie Liezietsu-i, state sorkari terenlok maparen atema senotsü peria magütsüteter, kechiyong sorkar mapa inyakertem nem itasen agütsüba nung sen jenti intoker, ta metetdaktsü.
Sorkar mapa nung nisung tali shimokba aser tiyazü pensioner tem tebilemtsü onük MLA temi benokbaji tim dang, ta shia CM-i, “Mapa nung nisung tali shimokba tebilemtsü atema inyaktsü nüngdaker ta ni-a agizüker,” ta ashi.
Tanü Assembly nung Budget 2017-18 atema o lemtepdang Chief Minister-i, “Linük nung nütsüng den sorkar mapa inyaker medemdangra, sorkar mapa inyaker asenok timba aliba tebilemtsü lir. Iba ya state senpong atema khuret tuluka kümogo, aser iba nung ya senotsü jenti intokba ajanga terenlok mapatem atema onoki senotsü peria magütsüteter,” ta ashi.
State sorkar mapa inyakertem atema Revision of Pay (7th ROP) tasenba asoshi tembanga inyakogo, aser iba ya ajanga state senotsü khuret ano taliba bendenloker. Mapa nung tim mesüi nisung tali shimokba ya matalokdaktsütsüla, ta paisa ashi.
“Menüngdak ser nung nisung tali shimokba ajema akumtsü atema asenok ajak longjemer peipei department-i inyaktsüla, koba ajanga asenoki rongsen aser terenlok onüktem atema rangloker inyaktettsü,” ta CM-i ashi.
Paisa, Post Creation & Upgradation Committee agi Manpower Rationalisation Committee ta melenogo aser department balala nung nübo kwi nüngdaker, ibaji asadanga benoktsü atema parnok nem tashi agütsüogo, ta metetdaktsü.
Tiyazü nung pension agiba dak sentakba nung CM-i, aibelenertem putettsü atema nüngdakba mera ajak agidar, ibaji dang masü saka state sorkari pension sector merüktettsü atema maparen tenzükogo aser item ama tim masüba mapatem anentsütsü atema maparen tenzükogo, ta ashi.
State sentsüh dak sentakba nung CM-i, 2016-17 küm sentsüh tali akumbaji sorkari mazüoktettsüsa aliba kulitem ajanga lir, ajisüaka iba sentsüh ajema akumtsü atema mera takang kar agia inyaktsü, ta ashi.
12 buba Nagaland Legislative Assembly 15 buba senden March 21, 2017 nü tenzüka liasü aser tanü March 30, 2017 nü tembangogo. Nagaland Legislative Assembly Speaker, Imtiwapang Aier-i 12 buba Nagaland Legislative Assembly 15 buba senden tembangba sangdonga iba senden tembang.