Itasen USD 1 agitsü aser sodi magitsü: Trump

Washington, November 14 (Agencies): US Tir menden atema shima alisang, Donald Trump-i, pai US Tir itasen US sen 400,000 masü saka küm ka atema itasen US sen 1 dang agitsü aser sodi magitsü, ta metetdaktsü.
US Tir itasen nai agitsü asü ta asüngdangba langzüdang arishi küm 70 tain, Trump-i, “Nunga, ni itasenji magitsü. Ni ibaji magitsü,” ta ashi.
September ita nung election nüboyimdang pai itasen magitsü ta nangzüka liasü.
CBS-i minute 60 interview agidang Trump-i, “Ni bilemer, ozüng ka ama ni USD 1 bosa agitsüsa akümtsü, anungji ni küm ka piyong itasen US sen 1 agitsü. Ajisüaka ni ibajia (US tir itasen) memetet,” ta ashi.
Trump-isa, US Tir itasenji kwi’ar ni memetet ta ashiba den külemi ni sodi magitsü, ta shisem.
“Onok teinyaktsü jenti lir. Mapa teinyaktsü jenti lir, aser ni ibaji nüburtem atema inyakmatsüner,” ta pai ashi.
“Ni ibaji tembanga inyakner. Onoki saru ajema kümtsütsü, onoki health care atema inyaktsü. Tetezü, teinyaktsü aika lir. Anungji sodi magitsüsa akümtsü,” ta paisa ashi.
Taoba Mongolbarnü Tir election nung Donald Trump-i Democratic candidate, Hillary Clinton madak takok ngua liasü.