Item tobur tajung aiürtemi North-east India nema tangtetdaktsütsü

September 22, 2016 : North-east India nungi aiürtem tereprangtsü aser parnoki sobuba süoshi balaka asüba ajanga nüburtemi aiben tai angateter. Nübur karibo tang tashi parnok dang “North-east tsürji makmanü” aser “Parnoki tebur shi nung jangradaktsütsüsa sobur”, ta India yimti tulu nung oa aliba tetsürtem aija jembir.
Balakata India tiyong nung alirtemi parnok aitsüa sensatsüaka, parnoki telong ka küma lungjemer tetsükdaktsü mesüra tasü mait kümdaktsüba o kecha agia parnok manokshidaktsütsüsa alir.
Assam nungi Priyadarshini Chatterjee, Nagaland nungi Imlibenla Wati, aser Assam nungisa Rewati Chetri nungeri north east India nema tangtetdakja, India nunger rangben tenüng nung alima nung tobur tajungtila toktepba nung tokteptsü renema lir.
Assam tsür Priyadarshini Chatterjee ya taküm FBB Femina Miss India World nung takok korang angu aser lai India tenüng nung Miss World 2016 nung tokteptsü renema lir. Ano Miss International India nung takok angula, Assam tsür Rewati Chetri-i Tokyo nung taruba ita (October) Miss International 2016 nung India tenüng nung tokteptsü.
Iba den külemi Miss India Asia Pacific nung takok angula, Naga tsür Imlibenla Wati-i Miss Asia Pacific World nung linük rangben tenüng nung tokteptsü renema lir.