Item yabo melenshi nung jungdisü

~ I. Meren Lemtur, Tzüdikong.

1.    Na sentep kidang menden nung mezüng mener, nai atsünga moi nü sülen arur ajak nü dak tejemi ajak ailokdakja na ajanga ia mendaktsüba ya majung.
2.    Menden nung nai tetsüng ajak anokshjia amendang, nü den amenertembo gari nung aoer ama anokshidaktsüba ya majung.
3.    Na anünüdang mopungla süngku ama elen, elenna angakzüa anünüdang nü den amenerbo temang ajak rürüseta sentep tepiyong amenera tu!
4.    Nü den apetba nisungi sayutsüngi dangbo, nai pa/la dak tenük ranglokba dang masü, oda nokdaker oa tebanga mesepnüa amai jangra-a angar. Saka nai masenba nisungi sayutsüngidangbo Laishiba ajak züngmanüa ariteper amai akaaka matui Laishiba nung mejioker mapang indoker.
5.    Nabo pa/lai Tsüngrem o jembidang junga mangai sentep piyong mener, sentep senshia taoi kima nung teben ajak toksüka temoatsü nguogo ta salemer, koda anemsü jakla na!
6.    Arogotem nung revivel sendong akadang, councelor temi anir revival sentep nung ken tenshi dang ozüng süa telok ajak nokdakang ta ayimoktsür nokdakdaktsüba, iba yabo nisung ajak küsasa tejangraba masü, ano karbo temang nung timtem keter-a anarongdena mena lir nung koda! saka nai nokdakang ta mashiyongbo shibai jangraa lir pa/lai odang nokdaker atentsü. Saka nai nokdakang ta shir nisung kar timtem kar ajanga menokdak, nisung tsüngdang pa/laji tashimangar ama sayur masü na!
7.    Bazaar aser dokan nung  na shishidang, dokan kiburi memelungi kangshia nai mulungba sen paloka toktsür jena aoer ama aoba ya majunga no!
8.    Tangar süngjema mener Tenla kidang Tsüngrem o angaa ali teyalong nung nü Mobile ola agi Tsüngrem o ajak tu belena oatoker. Anungji yabo petsapetrongdaktsüba temenen ta bilemang.
9.    Sentep tatemi lokti sarasadem ‘Amen’ ta liromedema ashitsü meji nung mendeni telok temer tatem nung nisung ka nem tembanga sarasademtsü agütsür nung, tangar ajak anenaka nabo manentedi sarasadema kazüdang, mapang agütsür tu kecha masü kümdaktsür.
10.    Tangar kima kishi nung naro pungdang nung naro tajung anüpalua tsünüa lir, saka na khen kibok kisemi arunung naro tajung nung nai Sali metsü metsübanga toktsür aoer, naro kibur asoshi tejashi tulutibaji ibaji lir. Adianu, naji koda tejashitsü nisung asü na (?)
11.    Na lokti balala sentong balala nung nokdaker jembiba mapang nai nü olaji khen tashi-i jembili, khenbo olaji ajemzüka lur jembili ta jembir, nai ya metetang, nai jembiba o tajungji loktii tetsüngda iita kar dang angashir.
Arung, menürema zünger item yabo melenshidi ta lemsateper.