J Dey tepsetba atema Chhota Rajan den nisung 8 aitsü

Mumbai, Monupii (May) 2 (Agencies): Senior journalist Jyotirmoy Dey tepsetba ken o nung Rasemnü (Bodbar) special CBI court kati Rajendra Nikalje (Chhota Rajan) aser nisung 8 aitsüogo. Parnok ajak taküm piyong tepuokdak ayutsü temerenshi agütsü.
Okadakisa journalist Jigna Vora aser Joseph Paulson na dak tai tongloktsüba ajak agien. Rajan aser tangartemji nisung tepsetba, tasa tamajung atongba aser Maharashtra Control of Organised Crime kübok onük aika nung aitsü.
Journalist ka amakbaji democracy indang tongshi pezübuba amakba ama lir anungji parnok dang taochi mesayutsüla, ta Special public prosecutor Pradeep Gharat-i oshidang agütsüdang ashi.
Külen tai tongloktsürtem atema okatsüri, “iba ya kodanga matalokdangba lendong ka masü anungji parnok nem tasüba temerenshi magütsütsüla” ta temepishiba ka agütsü.
Arishi küm 56 tain Dey ya Mid-Day osangkaket atema journalist ka liasü aser pa Aami (June) 11, 2011 nü khaset. Dey ji Mumbai kübok Powai kiyong nung par kidangi meyipa aodang tepset.
Dey tepsetba ken o nung CBI court kati Chhota Rajan aser nisung 8 dak tai tongloktsü.
Mezüngbo Mumbai Police-i iba ken o bushisüngdang asü aser parnoki 2011 küm nisung 11 apu. Rajan-i Dey tepsettsü tetuyuba agütsüba ama parnoki tasa atonga inyak ta police-i parnok 11 dak tai tongloktsü.
2015 küm Rajan apuba sülen iba ken o ya CBI nem agütsü aser parnoki Rajan anema supplementary chargesheet ka benok.
2016 küm CBI-i chargesheet benokba nung Rajan-i Dey tepsettsü tetuyuba agütsü ta kuli agütsü. Dey-i züluba kakettem aser ocettem nung pa tenüng menüktsür ta Rajan-i ashi.
Rajan ya tang Delhi nung aliba Tihar jail nung puoka lir aser tanü video-conferencing ajanga okadak noktakdaktsü.