J Dey tepsetba ken o nung nisung 10 anema ken o benokogo

Mumbai, June 08 (Agencies): Kümpezü tejaklen Mumbai nung journalist, J.Dey tepsetba ken o nung tanü special court kati tetsür journalist, Jigna Vora densema nisung ter anema ken o kar benokogo.
Maharashtra Control of Organised Crime Act (MCOCA), Indian Penal Code kübok item ken oji benok, ta Special MCOCA Judge, A.L. Pansare-i ashi.
Parnoki Dey tepsettsü tasa yangluba aser telungpur tetsüdi, Chhota Rajan den parnok tesentaktep aliba osangji courtnung zünga metetdakja liasü, saka tai tonglokja alir ajaki parnoki aibelenamali, ta shiogo.
Mumbai, Powai nung June 11, 2011 anepdang motorcycle ana nung nisung kar arur Mumbai eveninger Mid-Day, Investigations editor, Dey dak injang pongu kalokja liasü, iba sülen anasa aliba hospital kati pa anir ao, saka taküm mekümzükteti süatok.
Jigna Vora-i Dey alitak tesemtem, pa indang motorcycle number aser tanga osangtem telungpurtem nem metetdaktsüba asoshi la November 2011 nung pua liasü.
La dak alia Vinod Asrani, Paulson Joseph, Deepak Sisodia, Satish Kalia, Abhijeet Shinde, Arun Dake, Sachin Gaekwad, Anil Waghmore, Nilesh Shendge aser Mangesh Agawane nunger anema-a ken o benokogo.
Iba ken o nung sentaka alir BookieAsrani bo tawa shiranga süogo aser Chhota Rajan den Narayan Bish nabo jenshia senzüdagi.
Bushisüngdangertemi ashiba agi, Dey-i Chhota Rajan jashitsüsa ocet kar züluba ajanga pa tepset.