J&K nung tensa azüokogo; tenokdangbatem reprangshitsü

Srinagar (Jammu & Kashmir, August 16 (Agencies): Hokolbarnü Jammu & Kashmir nung ketdangsertemi Section 144 ozüng magienba tesemtem semdanga tensa reprangshiogo, ta sorkar osang ka ajanga metetdaktsü.
Section 144 ozüng ajanga tesem ka nisung pezü dak tali adenshitsü memelar.
Centre sorkari Jammu & Kashmir nung Arrla 370 agiena Jammu and Kashmir (Reorganization) Act, 2019 agizükba aser Union Territories ana kümtsüba (Jammu and Kashmir aser Ladakh) sülen state nung sepai aika yoksema liasü aser curfew ozüng benoka liasü. August 14, 2019 nü sorkari, tilateri tatalokba kar nung ‘pellet’ agi nisung kar yiruba dak alaka tang Jammu & Kashmir nung tensa azüokteta lir, ta metetdakja liasü.
Srinagar nung osangbenertem den jembidang Jammu & Kashmir nung Additional Director General of Police (Law and Order), Munir Khan-i, nisungtem meyirutsütsü atema security sepaitem aser administration-i inyakdar, ta metetdaktsü.
Khan-i, “State nung tensa junga azüokteta lir. Srinagar tesem balala aser tanga districts kar nung tilateri tatalokbatem liasü, ajisüaka nisung shinga tashii meyiru. Nisung kar ‘pellet’ agi yirua anepaludar. Nisung shinga meyirutsü atema onoki nendaka inyakdar,” ta ashi.
Ano Jammu & Kashmir Principal Secretary, Rohit Kansal-ia, tenokdangbatem agientsü atema ketdangsertemi tesem balala semdanga tensa reprangshidar, ta metetdaktsü.
Rohit-isa, “Local ketdangsertemi tensa reprangshidar aser tesem balala nung tensa apir tenokdangbatem agiendar,” ta metetdaktsü.
Paisa, “Hospitals, medical facilities, civil supplies, national highways aser airport nung akhi ama service agütsüdar,” ta shisem.