Jabaso aser jala kasa züngshia maongka agütsütsüla: Big B

New Delhi, May 28 (Agencies): Sorkari benokba mapatong ‘Beti Bachao, Beti Padhao’ ya tetsürtem nem tashi agütsütsü atema lenmang ka lir, ta shia tanü Bollywood actor, Amitabh Bachchan (Big B)-i, tetsür chanutem kümzüktsü aser tajungtiba agi anitettsüji tongtibang, ta metetdaktsü.
BJP-i aniba NDA sorkar küm ana ajungba benjungmung dak sentakba sentong “Ek Nayi Subah” nung jembidang Amitabh Bachchan-i, “Linük nütsüng tesadang ka shi (tetsürtem) tesülen senzüka metoktsütsüla, ta asenoki angatettsü mapang tongogo. Linük terenlok nung parnok nema kasa shilem agidaktsütsüla,” ta ashi.
Sanskrit shin o tetshia Bachchan-i, “Tamangba yimsü nunga tetsürtem nem tongti shilem agütsüogo, kechiyong Saraswati ji shisatsü temaitsü lir, Lakshmi ji rongsen temaitsü aser Durga aser Kali naji tashi aser ain temaitsü lir,” ta ashi.
“Tang tensa nung, lokti nung tetsür aser tebur na kasa züngshi nungang iba imdangjem atangji nung ataloktsü. Jabaso asoba ama jalatema kasa asotsüla aser parnoki akumli nung shilem shitak inyaktettsü atema shisaliok junga agütsütsüla,” ta paisa ashi.
Arishi küm 73 Bachchan-isa, yimyim tasen, ‘Beti Bachao, Beti Padhao’ (Jalatem kümzükang, jalatem nem shisaliok agüjang) tetezü jabaso aser jala na bendanga mamshitsüla, aser anapronglaji kibong rongsen ta züngshia kasa maongka agütsütsüla,” ta ashi.
Bachchan-i ashiba agi, Mahatma Gandhi-i tetsürtemji tashi taitba ta teti züngshi, kechiyong telung tashi nungbo teburtemi tetsürtem den tokteptsü makok.
Tetsür kaketshirtem telok ka den  jembidang tetsür kati, kodaser pa ‘Big B’ akum ta asüngdang, aser iba telangzüba agüja Amitabh Bachchan-i, “Ni ‘Big B’ masü. Ibaji osangbenertemi amshiba nüngja,” ta ashi.