Jabaso ka danga masoba atema teka anaprong raksatsü

Shahjahanpur, Rongchii (April) 10 (Agencies): Uttar Pradesh nung tetsür kati jabaso ka danga mesoi jala asem asoba atema la kinungbo aser par kinungertemi tejashi nung la indang teka anaprong raksatsü.
“Tetsürla kanga mejungi yirua lir aser onoki medical report atar. Aibelenertem dak ozüng tapet agi merenshitsü” ta Superintendent of Police (Rural) Subhash Chandra Shakya-i ashi.
Iba ya Babra yimtsüng nung atalok aser tawa tu Rekha Devi (30) tsüraburtemi la semdangdang ang iba osang ya temai adok. Parnoki la kanga mejungi yirur lia angu aser la mozü kidangi anir aoba sülen la kinungbo aser par kinungertem anema FIR ka benok, ta Shakya-isa ashi.
La ya tepuokdak ayur ka ama ayu aser iba tatalokba sülen lar tsüraburtem den-a mejembidaktsü, ta SP-isa shisem.
Rekha ya küm 8 tejakdang Shailandra Kumar den kibong aküm.
Ita ishika tejakdang Rekha-i jala tasembuba asoba sülen la kinungbo aser par kinungertemi la dak tashiyim mapa inyaktsü tenzük, ta Superintendent of Police (Rural)-isa osangbener dang ashi.
Metsüremi (March) 30 nü Shailandra, pa tenu Jitendra Kumar aser ano kinunger kari Rekha dak azük aser idangji la indang teka anaprong raksa. Iba sülen Rongchii (April) 4 nü-a parnoki la dak züka merenshi, ta police-i metetdaktsü.
Shailandra, tenu Jitendra, tebu Dataram aser tetsü Reshma Devi nungertem anema FIR ka benoka lir, ta parnokisa shisem.
Parnok ajak ya IPC kübok 325 aser Protection of Women from Domestic Violence Act o Dowry Prohibition Act kübok arrla aika kübok tai tonglokja lir, ta SP Shakya-isa ashi.