JAC-i jana indokba tesem merektsütsü akhanger

Dimapur, Luchii/December 5 (TYO): Dhobinall nungi Signal Angami aser Thahekhu-i atuba lenmang, koba New German Technology amshia 2015 küm yangluogo, iba lenmang ya imlaba ama masü aser tang lenmang den kilentsü dena yanglushi tenzüktsü sentong lir.
Iba dak sendakba nung Joint Action Committee (JAC) Dhobinalla-Signal Angami-Thahekhu-Rangapahar Road-i, Lhomithi colony nung Pranabananda Women’s College-i aiba lenmang nung jana intokdak aliba ajanga Lhomithi colony nung teti teshinem menema dang alir aser iba ya temang asoshia majung. Kasa mapang nung iba jana intokba tesem ajanga lenmang aser kilentsü yangluba nung timtem agütsütsü, ta ashi.
Anungji JAC-i Dimapur Municipal Council dang lenmang aser kilentsü yangluba nung kecha tetsükdaktsü madoktsü aser nüburtem temang anema toktsütsü mechi iba jana intokba tesem anogoshi merektsü mepeshiba sangdong ka ajanga metetdaktsü.
Maneni JAC-isa, kilintsü yanglua aliba atsünga aruba kanga junga asadangshitsü asoshi iba dak sendaka aliba ketdangsertem dang mepeshia metetdaktsü.