JAC-Manipur sorkar senden nung telemtetba kecha magitet

Imphal, April 12 (Agencies): Joint Action Committee Against Anti-Tribal Bills (JAC-AATB) aser Manipur sorkar tsüngda olemtep tanabuba Mongulbarnü Imphal nung agi saka iba nung telemtetba tajung magiteti tembangogo.
Chief Minister indang Secretariat nung JAC-AATB aser Manipur sorkar tsüngda senden gondha asem shi agi saka JAC-i takhangba agütsübatem asoshi telemtetba kecha magiteti tembang, ta osang ka ajanga ashi.
Joint Action Committee Against Anti-Tribal Bills-i akhangba onük karbo MLR aser LR Act of 1960 anema lir, ta osang ajangasa shisem.
Senden nung JAC nungi züngsem 13 aden aser sorkar tenüng nung Chief Minister aser par Cabinet züngsemtem den Chief Secretary, Oinam Nabakishore Singh aser Manipur Police DGP, LM Khaute nungertem aden.
“Senden nung telemtetba kecha magiteti tembangogo” ta JAC lennir kati osangbener dang ashi.
August 31, 2015 nü Manipur Assembly-i bill asem agizüka ayu saka bill asemji lisopurtem anema lir ta anema noktaker.
Bill anema lungkak aitdang Churachandpur district nung nisung 9 khaset aser parnok indang tasümangji tang tashi Churachandpur District Hospital mortuary nung yua lir.