Jackie Chan film ‘Kung Fu Yoga’ 2017 Jan nung sayatsü

Mumbai, October 04 (Agencies): Nüngtugu martial art actor, Jackie Chan-i tongti shilem agiba film “Kung Fu Yoga” sangküm January 28 nü sayatsü, ta osang ka ajanga metetdaktsü.
Actress Amyra Dastur-i “Rush Hour” star, Jackie den külemi film tasenba nung shilem agia lir, aser lai twitter ajanga film sayatsü anogo sangdongba den külemi film poster sayaa liasü.
“‘Kung Fu Yoga’ 2017 January 28 nü sayatsü! Yongyaa ataang,” ta Mongolbarnü Amyra-i twitter ajanga metetdaktsü.
“Kung Fu Yoga” ya China-Indian project ka lir, aser iba film ya China Tir, Xi Jinping-i India semdangba mapang linük ana tsüngda film asem yanglutsü tezüngzüktep agiba film tem rongnung ka lir.
Kasa film nung actor Sonu Sood-ia shilem agia lir.
Osang angazükba agi iba film nung Hindi film stars kari action shilem kanga junga agia lir aser Farah Khan-i choreograph asüba Bollywood ken-a ka lir.
Stanley Tong-i direct asüba action comedy film ya India aser Iceland na nunga tangokogo, kong Jackie-i Amyra nem farewell cake ka agüja liasü.
“The Legend of Drunken Master” star Jackie-i tanga mapangtem nunga India nunger actor tem den külemi shilem agia lir.
Tamalen Jackie Chan-i Bollywood actress Mallika Sherawat den 2005 film “The Myth” nung külemi shilem agia lir.