Jackie Chan-i tang mezüng Oscar Award ka agizükogo

November 14, 2016: Honibarnü Governors Awards mapang China nunger martial art actor, Jackie Chan-i Oscar Award ka agizükogo.
Arishi küm 62 Jackie-i, “Film industry nung küm 56 tsüngda film 200 dak tema nung inyaka aruba sülen tatemsa (iba award agizüker)” ta ashi.
Paisa, par tsüraburtem den külemi mener Oscar award sentong reprangba bilemtet, aser tebui pa dang, nai film aika nung shilem agiaka kechiba nai Hollywood nung temetiba sempet magizüker ta asüngdangba bilemtet.
“China nunger” ta pa nüma tangtettsüa aliba atema pai par jila Hong Kong nem tenüngsang agütsü.
Paisa pa sapurtem dang pelaba lemsatepa, “Nenok ajanga ni kichiba nungi alemdang, ajemoktsü aser tsüngoktsü, aser kü teret sükdangaa maneni movies nung shilem agitet,” ta ashi.
‘Rush Hour’ nung Chan den külemi shilem agir Chris Tucker, actress Michelle Yeoh aser Tom Hanks nungeri pa metetpelatsüdang pa dang “Jackie ‘Chantastic’ Chan,” ta aja.
Chan mapa tajung reprangtetba atema Tom Hanks-i pelaa liasü, kechiyong Oscar award atema shimdang martial arts aser action comedy film tembo aiben sendoker.
Academy of Motion Pictures Arts and Sciences-i iba sentong ketdangsüa liasü.
Iba sentong nung Denzel Washington, Lupita Nyong’o, Nicole Kidman, Emma Stone, Ryan Reynolds, Amy Adams aser Dev Patel nunger densema Hollywood nung nüngtugu nsiungtem aika aden.

You must be logged in to post a comment Login