Jackie Chan India nung film tangoktsü:Sonu Sood

Dubai, March 20, 2016 : Jackie Chan-i pa shilem agitsü aliba Indo-Chinese film “Kung Fu Yoga,” India nung arua tangoktsü, ta Jackie den külemi tan mezüng shilem agitsü alisang, Bollywood actor Sonu Sood-i ashi.
“Jackie Chan India-i March 21, 2016 nü arutsü aser Jaipur nung anogo 15 nü amungtsü,” ta Hokolbarnü Times Of India Film Awards (TOIFA) 2016 indang red carpet sentong nung Sonu-i osangbenertem dang ashi.
“Dabangg” film nung shilem agisang, Sonu-i ashiba agi, pa martial arts movie star den ajurutepa India nung tangoktsü aliba shilem tangokba sülen ano Beijing-i aotsü.
“Ni Jackie den taruba hopta India nung ajuruteptsü aser iba sülen Beijing-i aotsü. Iba film ya October ita nung sayatsü sentong lir,” ta Sonu-i Delhi nung aliba designers Bharat aser Reshma nati arba suit semer kanga jangara ashi.
Sonu-i tesüsa shilem agia aliba film ji 2015 küm sayaba “Gabbar Is Back” lir aser pai ashiba agi, “Rush Hour” movie nung actor, Jackie ya kanga dang tila kümtetba aser kanga meranga inyakba nisung ka lir.
“Kung Fu Yoga” ya China Tir Xi Jinping-i India semdangba mapang India aser China na sentepa film asem yanglutsü nangzüktepba rongnung ka lir.
Iba film nung actress Amyra Dastur-ia shilem agitsü. Ashiba agi iba film atema Hindi film nung shilem agirtemi action tajung kar agi shilem agia lir.
“Kung Fu Yoga” ya Stanley Tong-i direct asü aser iba action comedy film ya Iceland nunga tangokogo. Iba mapang Jackie-i Amyra nem tatem salem ashidang cake ka alia agütsü.
“The Legend of Drunken Master” nung shilem agisang India-i aruba ya tan tasen masü. Pa 2013 küm khen aruogo aser ibaji masüdang India Bollywood beauty Mallika Sherawat den 2005 küm “The Myth” film nung külemi shilem agia lir.