Jackie Shroff indang short film Shunyata-i Award angu

(Agencies): Actor Jackie Shroff indang short film ‘Shunyata’ ajanga Los Angeles, US nung Best of India Short Film Festival nung award ka nguogo. Iba minute 22 film ya Chintan Sarda-i direct asü aser film meyirejang aika rongnungi trok shimba rongnung densema liasü. Film ya Los Angeles nung theater ka nung hopta ka sayua liasü. Iba sülen film industry nungi tetendangertemi iba film nem best film award agütsü, ta sangdong ka ajanga metetdaktsü.
Iba award agütsüba sentong ya Mack Sennett Studio nung Metsüremi 3 nü kaa liasü. Award den külemi senpet USD $1,000 densema lir. “Iba film festival nung shilem agitsü asoshi maongka anguba ya tetushi ulura. Jackie sir aser HOD tem teyari ajanga iba film takok nguogo aser ni parnok ajak dang kanga pelar. Iba award anguba atema onok kanga pelar aser ibaji dang masü saka iba film ajanga taoba ita ishika tsüngda ajangtetba atema kanga pelar. Iba film ajanga onoki nüburtem den sendaktepnüba sayuogo. Iba dak ajemdaker tanga mapa tuluba inyaktsü ni imlar. Ni kü indang feature film aser original series scripts tem Mumbai nung benokdangdar aser tarutsü nunga short film aika direct asütsü imlar,” ta Sarda-i ashi.
Shunyata film nung Jackie-i hitman Madhur shilem agir shiba tesasa nung dang aliba indang sayur. Pa lenti nung aliba tanur ka den medemer akümer aser pai ngua tanobusang ya ozüng raksar ka akümer.
Iba film ya ajunga aonung dang tangok. Maneni film ya Sarda aser Sunil Khedekar nati produce asüba lir.