Jacqueline Fernandez-i Shah Rukh aser Aamir den shilem aginür

New Delhi, August 7 (Agencies) : Actress Jacqueline Fernandez-i Salman Khan den 2014 küm ‘Kick’ film nung shilem agi aser tang lai Shah Rukh Khan o Aamir Khan na den külemi shilem aginür ta metetdaktsü.
Bollywood nung ano nüngtugu Khan ana den külemi shilem agitsü jangrar asü mejangrar ali asü mali ta asüngdangdang, Jacqueline-i “Kodaser mejangratsü, tena den külemi shilem agibaji nisung ajak taginüba list nung alitsü. Ibaji ajanga na actor ka ama tashi itshir. Actor teimba den külemi inyaksemba ajanga nai aika angazüker” ta langzü.
Arishi küm 30 tain Jacqueline-i tesüsabuba shilem agiba film- “Dishoom” sayaba sülen takok tulu anguba ajanga la kanga tetshir. Iba film nung lai Varun Dhawan aser John Abraham na den külemi shilem agi.
“Shah Rukh aser Aamir naji otsüsürtem lir aser tena den külemi shilem agitsübaji pungmang ka ama asütsü. Actor ka ama ni inloktsü aser angazüktsüla anungji ni tena den külemi shilem aginür” ta laisa metetdaktsü.
Jacqueline-i tang A Flying Jatt film ajungketba sentongtem nung shilem agir. Iba film by Remo D’Souza-i direct asü aser August 25, 2016 nü sayatsü. Iba film nung Jacqueline-i Tiger Shroff den külemi shilem agir.